Dengue vei mi 16 hmu tawh
Nimin khan Aizawlah National Dengue Day vawi rukna hman a ni a; Mizoramah kum 2021 chhung khan Dengue vei mi 83 leh kuminah thla li chhungin mi 16 hmuh chhuah a nih thu tarlan a ni.
National Dengue Day hi National Centre for Vector Borne Disease Centre (NCVBDC) bultumin Directorate of Hospital and Medical Education auditorium-ah hman a ni a; Mizoram University-a Department of Zoology leh Health Worker Training School-a mite nen hmangin, Dengue chungchang zirho nghal a ni.
Dengue Day hi May 16 a ni a, kuminah chuan sorkar chawlh ni a nih avangin nimin khan Aizawl leh district hrang hrangah hman a ni. Kumina Day thupui chu 'Dengue hi inven theih a ni a, i ṭangrual ang u' tih a ni.
National Dengue Day hmanna inkhawm hi NCVBDC state programme officer Dr Hmingthanmawii'n kaihruaiin, Mizorama Dengue dinhmun leh hmalakna a sawi a; consultant entomologist Dr K Vanlalhruaia'n Dengue thosi chungchang leh natna enkawl dan a sawifiah a, Thangniang Lunzosang Vaiphei-in thosi thlen theih natna laka inveng tura mipui mawhphurhna a sawi bawk.
Dengue Day hmannaa tarlan danin, kum 2021 chhung khan India ramah Dengue vei mi 1,93,245 an awm a, mi 306 an thi. Mizoramah chuan kum 2021 khan mi 420 endik zinga mi 83-in Dengue an vei a, kumin 2022-ah January aṭanga April thla chhungin mi 266 endik zinga mi 16-in Dengue an vei. Mizoramah Dengue vanga thi an la awm lo a ni.