Myanmar ráltlânte'n thisen an pe

Myanmar ram tualchhung buaina avanga sahimna zawnga Mizorama rawn lutte chuan Mizoram mipui chunga lawmthu sawi nan nimin khan Dawrpui Multipurpose Hall-ah thisen pek an huaihawt a, Civil Hospital, Aizawl tan thisen an pe.

Myanmar ráltlânte zinga an hruaitute chuan thisen an pek chhan sawiin, "Mizo mipui, tlawmngai pawl, kohhran leh political party hrang hrangte leh Mizoram sorkar lakah kawng tinrenga kan lawmzia lantir nan leh lawmthu sawi nana kan tih theih tâwkte kawng tin renga hlan lêt ve kan tumna kawngah a hmasa ber atan thisen pek hun kan buatsaih a ni," an ti.

Relief camp hrang hranga awmte'n a huhoa thisen an pek theihna tura hmunhma ngaihtuahsaktu Dawrpui Branch YMA chungah an lawm thu an sawi a; kawng hrang hranga raltlante tana hma hruaia hnung dâwltu Central YMA leh thisen pek kawnga hma lâkpuitu Association for Voluntary Blood Donation chungah an lawm thu an sawi bawk.

Myanmar ráltlânte hian thisen unit 48 an pe a, petute mipa 36 leh hmeichhia 12 an ni.