MADC chairman N Viakhu

Mara Autonomous District Council (MADC) protem chairman atana Governor-in a ruat K Hrahmo kaihhruaiin nimin khan MADC session hall-ah MADC Chairman thlan atan MNF-INC Joint Legis­lature aṭanga hming pe N Viakhu thlan a ni.

Tarlan tawh angin, MADC chairman atan hian mi pahnihin hming an pe lut a; chungte chu MNF & INC Joint Legislature aṭangin N Viakhu leh BJP Legislature Party aṭangin N Zakhai te an ni. MNF & INC Joint Legislature hian MDC 13 neiin BJP-in MDC 12 an nei a; ballot paper hmangin chairman hi thlan a ni.

Chairman thlan zawhah BJP leader M Laikaw leh MNF & INC Joint Legislature deputy leader HC Lalmalsawma Zasai ten chairman thar lawmpuina an sawi a; chumi hnuah N Viakhu chuan deputy chairman thlan hun Governor-in a ruat hnuah session neih leh tur a nih thu sawiin, tiamchin awm loin session a titawp a ni.