Dilkawn Water Supply Scheme hawng

Minister of state TJ Lalnuntluanga chuan May 17, Thawhlehni khan a bial chhunga Dilkawn community hall-ah lei hîpna (gravity) hmanga Dilkawn khua châwm tur tui lakna, Dilkawn Water Supply Scheme leh khaw chhung in tina tui connection pekna tur Functional Household Tap Connection (FHTC) a hawng.

Dilkawn Water Supply Scheme hi Jal Jeevan Misson (JJM) 2020-21 sum nuai 93.50 hmanga siam a ni a, FHTC hi cheng nuai 25.07 sênga siam a ni thung.

TJ Lalnuntluanga chuan, kuminah tuihna humhalh leh tihpun tinzâwnin tui lakna lui kam remchangah Green Mizoram Day hman tum a nih thu a sawi a; PHE leh Forest department-te chu inhnîm hnai leh ṭang tlang tur an nih thu sawiin, “Mipui nen ṭanghoa neitu thinlung pu chunga thawhho a ngai,” a ti.

Dilkawn Water Supply Scheme hi May 20, 2020-ah thawh ṭan niin, December 13, 2021 khan zawh a ni a, chenna in 212-ah tui connection pek a ni tawh. A siam nan hian sorkar laipuiin senso zinga 90% tumin, state sorkarin 10% a tum a, khawtlang mipuiin Rs 1,50,000 hû thâ an thawh bawk. Mi pakhatin ni khatah tui litre 55 thleng hmang anga chhûtin kum 2050 thleng mi 1,505 châwm zo tura duan a ni.