Changpat hmanga leiṭha siam dan zir

Nimin khan Lungleia Agriculture conference hall-ah Skill Training of Rural Youth (STRY) Training Programme on Vermi Composing (changpât hmanga leiṭha siam dan) buatsaih a ni a, Lunglei district MJA president Laltlanthanga’n a hawng.

Training hawnna inkhawm hi Lunglei ATMA project director Dr V Zodinsanga’n a kaihruai a; Laltlanthanga chuan, changpât leiṭha siam dan zirna chu trainee-te’n hlâwkpui ngei se a duh thu sawiin, “Thlai tharlám leh hrisel zawk kan ei theih nana mithiam zawkte’n an thiamna hmanga kut hnathawktute zirtirna an pek ṭhin a ṭul,” a ti.

Lunglei MJA President chuan, leiṭha chi hrang hrang ram páwn aṭanga lak luh a ni tih sawiin, “A nih dan tur ang taka kan hman loh avang leh chemical a nih angin thlai leh mihringte’n kan tuar a, Mizoin leiṭha pangngaia an thar nen a danglam hle,” a ti a; changpat hmanga leiṭha siam chu chemical tel lo a nih avangin thlai leh mihring tan a hrisel thu a sawi.

Training-ah hian ATMA deputy project director John Laltluangliana leh block technology manager Lalremruata ten changpat hmanga leiṭha siam dan an zirtir a, training-a telte hnenah Vermi Bed leh certificate hlan nghal a ni.