CYMA-in kuhvaa chhiah tihhniam an rawt ; Ruihhlo a hluar vangin ruihhlo dotu committee tuai thar a ni dawn

Central YMA hruaitute chuan nimin khan dan loa kuhva tawlh ruk chungchangah chief minister Zoramthanga an kâwm a; ram dang aṭanga kuhva rah lak luha chhiah lak tihhniam an rawt bakah, Mizorama dan loa kuhva tawlh leh ruihhlo chungchanga hmalak dan turah rawtna hrang hrang an thlen.

CYMA hruaitute hian Mizorama dan loa kuhva tawlh chungchangah CYMA hnuaia zir chiangtu study team-in report an siam aṭanga hmalak dan tur rawtna point 12 zinga sorkar hmalakna tur point pali Chief Minister hnenah hian an thlen a ni.

Chief Minister hnena CYMA hruaitute'n an thlen zingah - kuhvaah dan anga sumdawnna a kal theih nan chhiah lak (tariff rate) Basic Custom Duty 40% chu 20%-a tihniam tura hmalak te, kuhva rawn luhna district chu ramri leh hmun pawimawh a nih avangin sorkar lam thawktu dahah, mi bik leh rintlak dahte a tel.

Myanmar aṭanga kuhva luhna ber Champhai district-ah dan loa sumdawnna khuahkhirh a nih theih nan DC, SP leh tlawmngai pawl aiawhte telna Coordination Committee din te, Police, Customs leh Assam Rifles-te rualkhai taka an thawhho theih nana hmalakte an rawt bawk.

Central YMA-in rawtna an thlen chungchangah hian CM Zoramthanga chuan lo en zui a, theihtawpa hmalak nghal a tum thu a sawi.

CYMA hruaitute chuan, tun hnaia Mizorama ruihhlo a hluar em avangin kum 2018-a Chief Minister kaihhruainaa din State Core Committee on Ruihhlo Do chu tuai thar leh an duh thu an sawi a; Chief Minister pawhin Committee chu tuai thar a, May 27, 2022-a ṭhutkhawm ko turin a ruahman nghal a ni.