MZP-in Pûkzíng ram sah thlâk duh lo

MZP Gen.Hqrs chuan thuchhuah siamin, Pûkzíng khaw ram sât thla a, a chhehvela Chakma-te awmna khuate pek ṭhen tumna a awm niin an tarlang a; an duh loh thu leh an dodal zel dawn thu an puang.

MZP chuan, nimin khan MZP General Headquarters hruaitu­te'n an president Lalnun­mawia Pautu hoin Pukzing khua an tlawh tih sawiin, "Pukzing khua kan tlawh chhan hi tun hnaiah Mizoram sorkarin Pukzing Village Council ram sât thla a, a chhehvela Chakma khua - Silsuri, Hnahva, Hruiduk, Bekabeki leh Tuikuk khua Pûkzing Vengthar hnena Pukzing ram pêk a tum vang a ni," an ti.

MZP hruaitute hian Pukzing VC leh YMA hruaitute an kâwm a; Pukzing khawtlang hruaitute chuan, VC ding tharte hnenah an khaw ram sah thlak an phal loh thu leh a tàwp thlenga an do tur thu an sawi tih tarlangin, “No objection pawh an sign dawn loh thute leh sorkarin a pe lui a nih chuan thisen chhuah hial pawh an hreh dawn loh thute an lo sawi,” an ti a; Pukzing ram sah thlak a nih loh nan a ṭul anga hmalakho zel an remti tih an sawi.

Mizo hnam a him theih nana theihtawp chhuahin hma an la zel dawn tih sawiin MZP chuan, “Hnam dang lakah kan ram kan chàn zel loh nan leh kan ram a him zel theih nan hnam dangte tana ram sat thla lo turin thuneitute kan ngen a. Hnam dangte ram sahthlak tumna hi tihtlang a nih chuan a tàwp thlengin kan dodal zel dawn a ni,” an ti.