KHAWTHLIR

CYMA-in lawmpui
Central YMA chuan thuchhuah siamin, Mizoram Board of School Education (MBSE)-in High School Leaving Certificate (HSLC) Examination 2022 result a tichhuak ta chu lawmawm an tih thu leh thawktute inpekna fakawm an tih thu an tarlang a, "Pass percentage 70.64% kan nei hi a lawmawm hle. Pass zawng zawngte thinlung takin kan lawmpui a, hlawhtling rih lote pawh beidawng loa kal zel turin duhsakna kan hlan a che u," an ti.

Thisen pe
Central Higher Secondary School NSS chuan nimin khan an sikulah voluntary blood donation camp an huaihawt a, Aizawl Civil Hospital tan thisen unit 47 an pe a, petute mipa 41 leh hmeichhia paruk an ni.

CCC hawng
Aizawl bawrhsap Dr Lalhriatzuali Ralte chuan May 17, Thawhlehni khan Aibawk damdawiin (PHC)-a Makeshift Covid Care Centre a hawng a, Health department hnenah a hlan nghal. Makeshift Covid Care Centre hi Central Warehousing Corporation-in an pek cheng nuai 20 hmanga sak a ni a, damlo mi 40 vel leng thei tura ruahman a ni.

Lehkhabu Lehlin tha ber
Mizo Writers Association chuan ṭawng danga lehkhabu ziah, Mizorama lehlin, kum 2021 chhunga chhuak zinga ṭha ber atan 'Davida' tih a thlang a, lehkhabu letlingtu chu R Lalrawna a ni.

Kawng chanve Khâr a ni dawn
Aizawl Traffic SP Rodingliana Chawngthu chuan, PWD-in Hunthar Veng lei tlahniam (NH-54) an siam mek chu chak leh ṭha zawka siam a nih theih nan hna thawh zawh hma zawng kawng chanve khâr a nih dawn thu a tarlang. Traffic SP chuan, hna thawktute ngaichâng chunga lirthei khalh turin mipui a ngen a, hnathawh tibuai theia lirthei leh bungrua dah phal loh a nih thu a tarlang bawk.

Fall armyworm
Mamit District Agriculture Complex-ah nimin khan vaimim eichhetu pangang, fall armyworm laka invên dan tur inzirtirna buatsaih a ni a, Mamit district agriculture officer Zokhuma Varte-in a kaihruai. Damdawi insecticide (Emamectin Benzoate) an sem bakah, a hman dan inzirtir nghal a ni.

MITS tlangzarh
Information and Communications Technology (ICT) minister Robert Romawia Royte chuan May 17, Thawhlehni zan khan Hyve City Hall-ah Mizoram IT Society (MITS) páwl a tlangzarh. MITS thil tum chu - Mizorama information technology lama eizawna leh zirna chawi sân, sorkar hmalakna ṭawiawm, IT lama thawkte leh zirlaite inpumkhatna tura thawh leh a ṭul anga IT kaihhnawih thil pawimawhte mipui hriata puanzarte a ni.

MLA-in tlawh
Aizawl West-III bialtu MLA VL Zaithanzama chuan nimin khan a bial chhunga Bungkawn, Maubawk leh Lawipu venga zirna-inte a tlawh a, Maubawk Middle School hnenah computer a pe. MLA chuan, zirnaah ram hnuk a awm tih sawiin, “Hma kan sawn lehzual theihna tur chuan tihdanglam leh thlâk ngaite huai taka kan thlâk a ngai,” a ti.

Hman dan tur rêl
Siaha District Development Committee on Backward Community of Mara Community (Tipa RD Block) chuan nimin khan district bawrhsap Lalsangliana hoin DC conference hall-ah North Eastern Council aṭanga Tipa RD block tihhmasawnna tur sum Rs 4,91,68,987.53 an hmuh hman dan tur an sawiho a; AH&Vety, Agriculture leh Health department hnuaiah hmasawnna rahbi hrang hrang ruahman an rêl.

Minister-in hmanpui
Mizoram Ex-Service Leaque (MESL) Sub-Hqrs Champhai chuan nimin khan Champhai Kahrawt community hall-ah Assembly vawi 17-na an hmang a, minister of state TJ Lalnuntluanga'n a hmanpui. MESL Sub-Hqrs. Champhai hian Champhai district ṭhen hma a huam a, ex-servicemen 800 chuang leh ex-servicemen nupui 200 chuang an awm a, World War-II veteran 32 zinga pakhat a la dam a ni.