Cong hian thu an zûk - BJP President

BJP, Mizoram Pradesh president Vanlalhmuaka chuan, Mara Autonomous District Council inthlan zawh tâkah Congress party-in an thu an zûk reng niin a sawi.

Nimina Mizoram BJP pisaa inkhawmah Vanlalhmuaka chuan, “MADC inthlan neih zawh tâkah Congress party chuan an thu an zûk reng a, nimin piah lawkah tu mah thawhpui an tum loh thu an sawi hnu lawkah MNF nen thawh dunna thuthlung an ziak a, chumi hnu lawkah Congress President chuan Congress MDC-te chu hmai phih fai nan show cause notice a pe ve leh a ni,” a ti.

Vanlalhmuaka chuan, MNF-in Congress party chu chief executive member nihna an kian tih sawiin, “An zahawmna an hralh leh ta a, heng party pahnihte hi Mizoram mipui bum char chartute an ni,” a ti a; chuvang chuan MADC-ah sorkar ṭha a din a beiseiawm loh hle niin a sawi.

Mizoram BJP President chuan, BJP chu party satliah a ni lo a, an thupui awm reng pawh ‘Mi tinin an chanvo an chang tur a ni’ tih a nih thu sawiin, “BJP chu ram rawngbawltu kan nih avangin ram mipuite’n an mamawh ang development thlensak hi kan din chhan a ni,” a ti a; Mara mipui tan hmasawnna a awm theih nan MDC thar, Maraland siam ṭhat hna thawh duhte chu eng lai pawhin an lo welcome reng tih a sawi bawk.