2022-23 NSS thupui - Tui humhalh

Nimin khan Sports & Youth Services (SYS) minister Robert Romawia Royte pisaah State Level National Service Scheme (NSS) Advisory Committee Meeting vawi 18-na neih a ni a, kum 2022-23 chhunga NSS thupui atan 'Water conservation' (tui humhalh) tih an thlang.

State NSS officer Dr Zirlianngura, SYS deputy secretary ni bawk tarlan danin, kum 2021-22 chhung khan NSS-in voluntary blood donation camp vawi 72 huaihawtin, thisen unit 3,215 an pe a, thing 2,540 an phun. Mipui vantlang hman tur zun-in 25, public water point 11, public waiting shed pakua leh vantlang ṭhutthleng panga an siam a, faina hnatlang beihpui vawi eng emaw zat an nei bawk.

Sorkar laipuiin hmalakna tur programme hrang hrang a ruahman 16 an tihlawhtling a, NIMAS, Arunachal Pradesh-ah adventure camp nei turin NSS volunteer 20 leh programme officer pakhat tirh a ni. NSS Cell, Mizoram chu India hmarchhak state zinga PFMS leh EAT Module-a an agency zawng zawng register kim vek awm chhun a ni.

Ṭhutkhawmah hian kum 2022-23 chhunga NSS unit-te action plan - thisen pek, thing phun, awareness programme chi hrang hrang leh hmalakna turte an sawiho a; kum 2022-23 chhunga NSS thupui atan 'Water conservation' tih an thlang.

Kum 2022-23 aṭangin Mizoram Institute of Advanced Studies (IASE), College of Horticulture, Ratu HSS, Tlungvel HSS, Bungtlang HSS, Chhiahtlang HSS leh Ṭawipui HSS-ahte NSS unit thar din an remti bawk.

Robert Romawia Royte chuan, Covid-19 léng vanga kum hnih zet zirna kalpui mumal theih a ni lo chunga Mizoram NSS Cell-in ṭha taka hmalakna a kalpui thei chu chhuanawm a tih thu sawiin, "NSS hmalaknaah a remchan dan angin sorkar department leh agency hrang hrangte nena thawhho zel a pawimawh," a ti.

NSS hi Mahatma Gandhi pian champha vawi 100-na, September 24, 1969 khan India rama university 37-ah volunteer 40,000 thlangin din a ni a, Mizoramah chuan kum 1972 khan Pachhunga College-ah din a ni. Sorkar laipui chuan Mizoram tan NSS unit 301 (volunteer 30,100) din a phalsak a; ṭhutkhawma NSS unit thar din tura relte nen Mizorama zirna-in 99 (college/university 29, HSS/Technical Institution 70)-ah NSS unit 301 a awm dawn a ni.