Fall armyworm vên dan tur tichhuak

Lunglei district khaw hrang hrangah vaimim ei chhetu pangang, fall armyworm (FAW) hmuh a nih avangin Lunglei district agriculture officer C Malsawmkima chuan nimin khan vaimim chíngtute hriat tur a tichhuak a; theihtawp chhuahin FAW ven hna an thawk tih a sawi.

Lunglei DAO chuan, Lunglei district-ah vaimim intodelh a nih theih nan Agriculture department-in mi 1,975 hnenah vaimim chi (Var Suraj-251) quintal 395 a sem tih a tarlang a, "Vaimimte hi April thlaah tuhin, tunah hian a ṭo mek a, a ṭo hlim zîk ṭhenkhatah FAW hmuh a ni," a ti.

Vaimim chíngtute hriat tur
1) FAW hi vaimim zík karah an awm ṭhin avangin ngun takin pangang a awm leh awm loh enfiah ṭhin tur.
2) Vaimim zîk no chhungah hmarcha den sawm leh tui chawlhpawlh leih tur.
3) Hmarcha den sawm aiah hian sukhlo emaw, surf/sahbawn emaw a hman theih.
4) Vaimim ei chhetu pangang hmu chuan DAO/BAO-ah hriattir tur.
5) Damdawi leh mamawhte DAO leh Bunghmun/Lunglei/Lungsen BAO-ah lâk theih reng a ni.