Covid-19 positivity rate a tlahniam

May 17, Thawhlehni khan swab sample 314 endik aṭangin Covid-19 vei mi 12 hmuh chhuah a ni a, positivity rate 3.82% a ni. Nimin khan hripui vei dam tawh mi 74 chhuahtir an ni a, hripui vei thi an awm lo a, ni 16 chhung thi an awm tawh lo.

Thawhlehnia Covid-19 positive hmuh tharte chu mipa panga leh hmeichhia pasarih an ni a, TrueNAT hmanga hmuh chhuah pakhat leh RAT hmanga hmuh an ni. District pathumah chiah hmuh chhuah niin, Lunglei district-ah mi paruk leh Serchhip leh Saitual district-ah pathum ve ve hmuh a ni.

Nimin tlai dar 5 thlenga dinhmun angin, chawlhkar hnih chuang, ni 16 chhung a záwnin Mizoramah Covid-19 vanga thi an awm tawh lo a, thi an awm hnuhnun ber chu May 2, 2022 kha a ni. Tun May thlaah mi pakhat chiah thi a la awm.

IDSP record angin, Mizoramah Covid-19 vei 2,28,034 hmuh chhuah a ni tawh a, mipa 1,06,177 leh hmeichhia 1,21,857 an ni a, mipa aiin hmeichhia 15,680-in an tam zawk. Nimin tlai dar 5 thleng khan mi 2,27,155 (99.61%) chhuahtir an ni tawh a, mi 697 (0.31%) thi tawhin, enkawl mek mi 182 (0.08%) an awm.

Nimin tlai khan Saitual district-ah hripui vei enkawl lai 79 awmin, Mizorama district 11 zingah active case tamna ber a ni a; district pathum - Siaha, Champhai leh Lawngtlai district-ah hripui vei an awm rih lo.