Lalrinmawia Ralte leh T Sangkunga'n Minister leh MYC Chairman atanga bânna an thehlut

Mizoram sorkara minister of state Lalrinmawia Ralte leh Mizoram Youth Commission (MYC) chairman T Sangkunga chuan, nimin tlai khan chief minister Lal Thanhawla hnenah minister aṭang leh MYC chairman aṭanga bânna an thehlut.

Lalrinmawia Ralte hian nimin thlai dar 4 vel khan Chief Minister hmuin, banna hi a thehlut. A hnu zan dar 6 velah T Sangkunga hian banna hi a thehlut ve leh a ni. Banna thehluh hi pawm an nih dawn leh dawn loh hi hriat a la ni lo.

Hetihlai hian Chief Minister chuan eptu party-te'n báng tura an phût Lalrinmawia Ralte leh T Sangkunga chu amahin a bàn dawn loh thu sawi mah se, bànna an thehluha a pawm dawn leh dawn loh chu a sawi tel loh thu thuthar thehdarhtute a lo hrilh tawh a ni.

Bànna a thehluh zawha thuthar theh­darhtute zawhna chhangin Lalrinmawia Ralte chuan, bànna a thehluh chhan chu tute emaw nawrna leh ngenna vang a nih loh thu leh, thudik hailan a duh vang tih a sawi.

Lalrinmawia Ralte chuan, sum tiching­pena puh a nihnaah Chief Minister pawh a bul tumtua puhnate a awm ta hial tih sawiin, "Thu dik ber pawh hre loin mipui kan awm rei tawh hle a, chuvang chuan, chhui chian kan mamawh a, mipui hian thu dik hriat hi an chanvo a ni vein ka hria. Chuvang chuan, he thil thlenga mawhphurtu nia min ring tak tak a nih chuan minister ni chunga chhui ka har dawn a ni," a ti.

Department enkawltu ni lo leh nihna nei loa a awm chuan a chhuitute'n zalen takin an chhui thei dawn tih sawiin Lalrinmawia Ralte chuan, "Chuvang chuan Minister of State ka nihna aṭang hian bànna ka thehluh a ni," a ti a; Chief Minister chu a bànna thehluh pawmsak tura a ngen thu a sawi.

Tarlan tawh angin, NIAS, Kolkata-a zirlai tirh chungchangah MNF-te chuan Labour Employment & Industrial Training minister Lalrinmawia Ralte leh MYC chairman T Sangkunga, MLA-te chu a mawhphurtua puhin báng turin an phût a; an thil phût nawrna atan February 7-10, 2017 chhung khan an pisa kai tur an lo dang tawh a ni.

Lalrinmawia Ralte hi Hachhek bial aṭangin a záwnin term hnih thlan tlin a ni a, Congress sorkar hmasaah parliamentary secretary a ni a, tun sorkar kal mekah minis­ter of state niin, Labour Employment & Indus­trial Training, Environment, Forest and Climate Change, Soil & Water Conservation leh Cooperation department-te a chang a ni.

T Sangkunga chuan, "Pathianin dinhmun sang takah min dah a, MYC Chairman-ah te min dah a, Pathian malsawmna a nasa e. Nimahsela, heti luai luaia buaina a awm takah chuan, chiang taka chhuichhuah a nih theih nan banna ka thehlut a ni," a ti.

T Sangkunga hi East Tuipui constituency aṭangin kum 2013 inthlanah a ṭum khatna atan MLA aṭanga thlan tlin niin, MYC chairman nihna a chelh zui a ni.

Chief Minister chuan, Lalrinmawia Ralte leh T Sangkunga banna thehluh hi vawiinah ngaihtuah a nih tur thu Vanglaini zawhna chhangin a sawi.