Lo neitute tana loan pûk theih dan sawiho

National Bank for Agriculture and Rural Development (NABARD) chuan, nimin khan Aijal Club-ah lo neih leh a kaihhnawiha eizawngtute'n bank-a sum an pûk theih dan leh bank-te'n sum an pûktir theih dan sawihona, 'State Credit Seminar 2017-2018' an buatsaih a; chief minister Lal Thanhawla'n a hmanpui.

Chief Minister chuan, Mizoram economy chu lo neiha innghat a nih avangin hmasawnna atana sorkarin a ngaih pawimawh ber chu lo neitute dinhmun chawikan a ni tih sawiin, "Agriculture leh a kaihhnawiha thawkte'n bank aṭanga sum pûk kawnga harsatna an tawh leh bank-te'n sum pûk tur an bithliah tlem hi economy ṭhan zelna dâltu lian tak pakhat a ni," a ti a, agriculture leh a kaihhnawihte tihhmasawnna atana NABARD-in sum an thawh leh an pûktir ṭhin chu a ṭangkai thu a sawi.

Ram pumah bank-te'n mipui hnena sum an pûktir leh mipui aṭanga sum an vawn nan sumfai an dawn khaikhinna, Credit to Deposit (CD) Ratio 72% a nih laiin, Mizoramah chuan 39% vel a nih thu sawiin CM Hawla chuan, "Bank tam zawkte'n mipui hnenah an pûktir tur bituk RBI-in 60%-a phût chu an tihtlin loh avangin bank-te tan ṭan lakna tur a awm. Chutih rualin, mipui aṭang pawhin bank-te'n sum pûktir an inhuam theih nan project kan siamte'n belhchian an dâwl a ngai," a ti.

Chief Minister hian NABARD-in district hrang hrangte Potential Credit Linked Plan siam khaikhawmna report, State Focus Paper 2017-18 an siam a tlangzarh a ni.

Finance minister Lalsawta pawhin thu sawiin, loan rûl ṭha apiang an ding chhuak tih a sawi a, "Loan rûl ṭha lote zawk hi an pàm-ṭùl ṭhin an ni tih kan hriat a pawimawh. NABARD kaltlanga Rupay Kisan Credit Card-te ṭangkai taka lo neitute'n an hman theih nan kan tihlar leh hrilhhriat a ṭul a, lo neitutete sum pûk tur mamawh hi bank-te'n theihtawp chhuahin in ngaihtuahsak tur a ni," a ti.

NABARD hian kum tin State Focus Paper an buatsaih ṭhin a, district hrang hrangte Potential Credit Linked Plan-te khaikhawm­in, State Credit Potential Plan tarlan a ni ṭhin. Kum 2017-18 chhung hian Mizoram Credit Potential chu cheng vbc. 1083.73 nia tarlan a ni a, chumi aṭanga vbc. 427.88 chu agriculture leh a kaihhnawiha sum pûk thei ‘Credit Potential for Mizoram’ a ni.