Education Minister-in Union minister-te CCS Hindi zirtirtute hlawh tur an sawipui

School Education department enkawltu minister H Rohluna leh parliamentary secretary Joseph Lalhimpuia te chuan, Mizorama lo zin Union Science & Technology minister Harsh Vardhan leh minister of state for Home Kiren Rijiju-te an kawm a; Mizorama CSS hnuaia Hindi zirtirtute harsatna chungchang an sawipui.

H Rohluna leh Joseph Lalhimpuia te hian February 13, 2017 tlai khan Union Science & Technology minister Harsh Vardhan an kawm a; February 14 khan Assam Rifles 23 Sector headquarters, Khatlaah Home minister Kiren Rijiju an hmu leh a, DO letter a pe nghal a ni.

School Education Minister chuan, Mizoram chu Hindi ṭawng hmanna nih loh avangin ṭawng leh khawsak dan hrang a nih thu sawiin, chuvang chuan ram chhung hmun dangte nena inpawh a harsat thu a sawi a; Hindi chu Mizoram state tan ram chhung hmun dangte nena inbiakpawhna leh inpumkhatna atana pawimawh a nih avangin Hindi ṭawng zirtir a ṭangkai thu a sawi.

Mizorama CSS Hindi zirtirtute'n sum indaih loh vangin May 2016 aṭangin hlawh an lak mumal tawh loh thu sawiin, Rohluna chuan Union Minister-te chu sorkar laipui Revised Estimate nghakte chungah khawngaihna lantira hmalakpui tur leh, CSS Hindi zirtirtute hlawh chu sorkar laipui tum vek a nih avangin an thla 10 hlawh, Rs. 39,05,26,648 chu pek thuai an nih theih nan hmalakpui turin a ngen a ni.

CSS Hindi teacher-te chu tun February thla tawpah an thawh hun a tawp dawn thu sawiin, H Rohluna chuan, March 1, 2017 aṭanga kum 10 dang rawih chhunzawm an nih theih nan te, sorkar laipui tirha third party independent research agency-te'n thla thum chhung Mizorama zir chianna an neih chhunga ruai chhunzawm rih tura ngenna an siam thute a tarlang bawk.

Kiren Rijiju chuan, School Education Minister thu thlen chu a ngaih pawimawh thu sawiin, New Delhi-a a kir leh hunah theihtawp a chhuah tur thu a hrilh.