MNYF-te'n Minister in sak mek leh Dinthar venga MYC Hostel enfiah

MNF ṭhalai hruaitute leh organiser-te chuan nimin khan LEIT minister Lalrinmawia Ralte-in Hangi Lunglen Tlanga in a sak mek leh Dinthar venga Mizoram Youth Commission (MYC) Hostel-te tlawhin an enfiah.

MNYF thuchhuah chuan, LIET Minister leh Mizoram Building and Other Constructions Workers Welfare Board (MBOCWWB) Chairman-in in a sak dan leh MBOCWWB sum hman dan ngaihtuahin, thil rinhlelhawm tak a awma an ngaih thu a tarlang a; "NIAS leh hmun danga zirlaite sum siam nana an hmannaa senso cheng nuai 461.75 aṭang hian chan a neih ngei kan ring tlat a ni," a ti.

MNYF chuan, MYC chairman T Sangkunga’n Dinthar Venga a inah MYC Hostel hawn a ni tih sawiin, "Hemi atan hian Mizoram sorkar aṭangin cheng nuai 150 MYC hian a dawng a ni," an ti a; MYC Chairman chuan a in chu sorkar sum cheng nuai tam tak sêngin MYC Hostel atan a cheibawl tih sawiin, chu chu thuneihna hman sualna leh eiruknaa an ngaih thu an sawi.

MNF ṭhalaite hian NIAS, Kolkata chung­chang avangin LEIT Minister leh MYC Chairman-te chu a rang lama bànna thehlut turin a chah nawn leh a ni.

Nimin vêk khan MNF party chuan thuchhuah siamin, chief minister Lal Thanhawla chu 'Chief Minister ka nih chhung chuan LEIT Minister leh MYC Chairman an báng dawn lo' tia a sawi avang­in Mizoram mipui zahlo hleah an puh nawn a; Congress sorkarin zirna chung­changah thil a lo ti fuh lo fo tawh niin an tarlang.