Mamit district-a hnathawhte thlirho

Mamit District Level Development Coordination & Monitoring Committee chu nimin khan an chairman CL Ruala, Lok Sabha MP hoin DC conference hall-ah an ṭhukhawm a, Mamit district chhunga hmasawnna hna thawh hrang hrang an thlirho.

CL Ruala chuan, hmasawnna hnathawhna kawngah district officer-te chu thâ thla loa theihtawp chhuah zel turin a sawm. Co-chairman Ronald Sapa Tlau, Rajya Saha MP pawhin thu sawiin, "Hmasawnna hna hrang hrang thawhnaah district officer-te hmalakna a lawmawm hle a, theih­tawp chhuahin ram leh khawtlang tan thawk zel ang che u," a ti.

Meeting-a tarlan danin, MGNREGS hnuaiah hian job card nei mi 20,648 an awm a; inhlawhna Zawlnuam-I ah ni 14, Zawlnuam-II ah ni 28, West Phailengah ni 14 leh Reiek Block-ah ni 28 siam a ni tawh.

National Health Mission hnuaiah mi 81,946 tuam a ni a, nau piang 1,000-ah nausen 21 an thi anga chhût niin, hemi kawngah hian hmasawnna hmuh mek a ni.

Kum 2016-17 chhung­in sikserh vanga thi an awm lo a, Mamit District Hospital hnuaiah ICTC din a ni. HIV hrik pai leh pai loh mi 284 endik tawh a ni a, HIV hrik pai mi 64-in ART damdawi an la.

SSA Mission hnuaia naupang chawchhun pek kalpui chhoh zel ni a ni a, chaw chhûmtute hnenah thla khatah Rs. 1,500 zel pek a ni.

Meeting-ah hian Mamit district-a MLA VL Robiaka bakah, DC Lalbiaksangi te pawh an tel a ni.