Lalsawta'n mobile wallet a tlangzarh

Finance minister Lalsawta chuan, nimin khan IPR directorate auditorium-ah SIMsePAY (mobile wallet) a tlangzarh. He hunah hian IPR minister Lal Thanzara'n PACS documentary film a tlangzarh bawk.

Khuallian Finance Minister chuan, SIMsePAY chu smart phone hmang lo leh internet connection nei lote tan pawha mobile phone pangai hmanga indawr­na leh pawisa inthawn theihna (digital banking service) a nih thu a sawi a, "Phone ṭha lei thei lote tan leh hmun kilkhâwr zawk internet connection ṭhat lohna hmuna awmte tan a ṭangkai lehzual dawn. Sorkar laipuiin cashless economy kalpui tura hma a lak mek nen pawh a inhmeh hle a ni," a ti.

Khualzahawm Lal Thanzara chuan, Primary Agriculture Credit Cooperative Societies (PACS) documentary film a tlangzarh paha thu sawiin, hmun kilkhâwr zawk, bank la awm lohna hmun­a bank ang chiaha sum khawlna, deposit leh loan-te an pe chhuak ṭhin chu lawmawm a tih thu a sawi a; PACS chu tun aia nasain kut hnathawktu te, pawl leh kohhrante pawhin an hman ṭangkai zel a beisei thu a sawi bawk.

SIMsePAY hi Mizoram Cooperative Apex Bank leh YES Bank ṭangkawpin an siam a ni. He mobile wallet hmang hian Apex Bank-a account neite tan mobile phone eng chi pawhin internet connection awm lohna hmunah pawh phone signal hmangin khawi hmunah pawh, engtik hunah pawh banking transaction a tih theih a; SIMsePAY atana hman tur Wafer SIM chu Apex Bank branch aṭangin Apex Bank-a account neite tan a thlawnin a lak theih a ni.

Mizoram hmung hrang hrangah Apex Bank hnuaiah PACS 26 din a ni tawh a; Teikhang PACS bikah depositor 293 awm­in, mi 128 hnenah loan pek chhuah a ni tawh tih sorkar thu­chhuah chuan a tarlang.