KHAWTHLIR

IPS kaisang
Mizoram police-a DIG (Northern Range) LT Hrangchal, IPS chu IGP grade-ah a kaisang a; hemi chungchanga hriattirna chu Ministry of Home Affairs-in February 14, 2017 khan a ti­chhuak. LT Hrangchal hi tun February thla tawp­ah pension-in a chhuak dawn a ni.

Sumdawnna zirho
RBI Foreign Exchange department, Guwahati chuan nimin khan Champhaia IPR auditorum-ah Import-Export leh border trade zirhona an buatsaih a ni. Seminar-ah hian bungraw lak luh leh thawn chhuah leh, Indo-Myanmar ramri hrúla insumdawn tawnna kaih­hnawiha hriat tur hrang hrang te, border trade atana lehkha pawimawh ngaite leh danin bungraw lak luh leh thawn chhuah a phal leh phal loh chinte zirho a ni.

Chhiatna zirho
District Disaster Management Committee ­chuan, nimin khan Mamita Shelter Home-ah 'Training on Disaster Risk Reduction & Mock Drill' an buatsaih. Disaster Management Committee-a mi Lalchhuanawma'n kângmei chhuak leh lirnghing laka himna chungchang a sawi a; Mamit DO Angela Saidingliani'n Basic First Aid chungchang a sawi bawk.

Zir chian tul ti
Model English Primary School, Chanmari chuan nimin khan Annual Function an hmang a; an hun hmanpuitu School Education minister H Rohluna chuan, sorkar sikula zirlai lut an tlem chhan zir chian a ṭul thu sawiin, "Sikul naupang tam zawk nei thei tura ṭan lak a ngai," a ti.

Zu man zat
Excise & Narcotics department chuan, January 2017 chhung khan zu zuar 44, zu rûi 115, zu bilh lai ṭín 1,098.05, rakzu litre 3,372, sap zu (ûm puitling) ûm 48 leh zu sakna bél 67 an man.

Mi 1,233 admit
January 2017 chhung khan Aizawl Civil Hospital-ah mi 31,722 an inentir a, mi 1,233 chu admit an ni. Nau piang 376 an awm laiin, mitthi 59 an awm a; damlo mi 191 chu Mizoram páwn­ah inenkawl tura thawn an ni.