Rinmawia leh Sangkunga bânna Chief Minister-in la ngaihtuah lo

Mizoram sokara minister of state Lalrinmawia Ralte leh Mizoram Youth Commission (MYC) chairman T Sangkunga ten an nihna aṭanga bânna an thehluh chu, Chief Minster Lal Thanhawla a zin bo avangin ngaihtuah a la ni lo.

Vanglaini palai zawhna chhangin Chief Minister mawh­phurh­na la mektu Home minister R Lalzirliana chuan, "Bànna pawm leh pawm loh chungchang hi Chief Minister thu thu a ni a, thutlukna a la siam lo," a ti a; Chief Minister hian a zin haw hunah thutlukna a siam a rin thu a sawi.

Chief minister Lal Thanhawla hi nimin khan khawchhak tlangdung fang turin a zin chhuak a, ruahman lâwk ang chuan February 18, 2017-ah Aizawlah a lêt leh dawn a ni.

Home Minister chuan, Lalrin­mawia Ralte leh T Sangkunga te bànna thehluha thutlukna siam turin thil hmanhmawh thlak tak a awma a hriat loh thu a sawi.

Labour, Employment & Indus­trial Training minister Lalrinmawia Ralte leh MYC chairman T Sang­kunga te hi party hotute aṭanga nawrna a awm lo nia sawiin, R Lalzirliana chuan, "An chhia leh ṭha hriatna hmangin bànna an thehlut a ni," a ti.

Tarlan tawh angin, Lalrinmawia Ralte leh T Sangkunga hian NIAS, Kolkata-a zirlai 32 tirh an nih chungchang leh a kaihhnawih hrang hrang avangin February 15, 2017 tlai khan Chief Minister hnenah bànna an thehlut a ni.

Lalrinmawia Ralte chuan, sum tichingpena puh a nihnaah Chief Minister hming hial sawi lang an awm tih sawiin, "Thu dik ber pawh hre loin mipui kan awm rei tawh hle a, chuvang chuan, chhui chian kan mamawh a, mipui hian thu dik hriat hi an chanvo a ni vein ka hria," a ti a; he thil thlenga mawhphurtu nia an ring tak tak a nih chuan minister aṭanga a ban hnua chhui a inhuam thu a sawi.

T Sangkunga pawhin, "Pathianin dinhmun sang takah min dah a, MYC Chairman-ahte min dah a, Pathian malsawmna a nasa e. Nimahsela, heti luai luaia buaina a awm takah chuan, chiang taka chhuichhuah a nih theih nan bânna ka thehlut a ni," a ti.