Naupang maktaduai 11 football zirna hawng

FIFA Under 17 World Cup denchhena India rama naupang maktaduai 11-in football an zirna tura duan, Mission XI Million chu Mizorama kalpui ve turin nimin khan minister leh MFA president Lal Thanzara'n Chanmari YMA hall-ah a hawng.

Sorkar laipuia Youth Affairs and Sports ministry leh All India Football Federation-in an kalpui Mission XI Million hi Prime Minister narendra Modi duh anga duan a ni a, he thil kalpuina tura India rama khawpui 31 thlan zingah Aizawl chu thlan tel a ni a; School Education department-in sikul hrang hrangah an kalpui dawn a ni.

MFA president ni bawk Lal Thanzara chuan he mission hi Mizoramah hlawhtling taka kalpui chhoh ngei a beisei thu sawiin, "A rahchhuah hmangin Mizo naupangte'n Indian football-ah chanvo pawimawh an neih phah ngei ka beisei. Football avangin Mizoramin hriat a hlawh a, I League-ah player 55 zet thawh thei state kan ni," a ti a, Mizo naupang 17 ten Germany-a training an neih thu te, SSA leh Tata Trust-te nen ṭanghoa grassroots football center 60 a football zirtirna kalpui mek a nih thute pawh a sawi.

Mission XI Million Head, Sonia Minocha chuan an thil tum te a sawi fiah a, FIFA Under 17 World Cup-in football ah chauh lo pawh India ram a nghawng dan turte, India ram puma football chawi lar tura ṭan an lak dante a sawi.

Inkhawm hi School Education department joint director ST Zaduna'n a kaihruai a, Aizawl khawpui chhung leh a chhehvela zirna in hrang hrang aṭangin zirtirtute an tel a, naupangte inkhelhna tur football pek an ni.

Mizoramah chuan Mission XI Million hi co-ordinator Francis Paul-a hoa kalpui tur a ni.