Zo Hnam Cultural Meet hman a ni

ZoRO ṭhalaite leh Aizawl City College Joint Students' Union-te chuan, nimin khan Vanapa Hall-ah Zo Hnam Cultural Meet 2017 an buatsaih a, parliamentary secretary Joseph Lalhimpuia khuallian a ni.

Joseph Lalhimpuia chuan, hnam inpum­khatna leh inlungrualna tichhe thei a nih chuan hmasawnna reng reng a hlu tâwk lo tih a sawi a, "Tunlaiin khawvelin kawng hrang hrangin hma a sawn zel a, digital world, computer age-ah hian kan hnam nihna - rinawmna, tlawm­ngaihna, taimakna leh aia upa zahnate hi kan vawng nung thei a, ṭhalaite hian kan awm-na hmun apiangah kan chawi nun a ngai a ni," a ti.

Meet-ah hian college zirlai ṭhahnem tak an tel a, Aizawla college hrang hranga zirlaite'n hnam làm leh zai chi hrang hrang entir a ni.