Vanapa thlân awmna hmun sawifiah
Hnahlan Welfare, Aizawl-a Vanapa Thlan Sub-Committe-te leh Vanapa thlah pangana, C Ṭhasiama chuan, Vanapa (Thangzachhinga, Chawngthu Vanchiau hnam) lu nghahna hmun chu Hnahlan ram chhung, Tuiṭhoh lui kam ngei a nih thu nimin khan an puang.
Hnahlan Welfare hnuaia Vanapa Thlan Sub-Committe-te leh Vanapa tute bakah, INTACH Mizoram Chapter hruaitu ṭhenkhat leh Hnahlan khaw tlang hruaitute chuan nimin khan Aizawl Press Club-ah thuthar thehdarhtute an kâwm a; Tuiṭhoh lui kama Vanapa phûm a nih dan an sawifiah.
An sawi danin, Vanapa chêttlatna leh awm tawhna khuate chu - Zawngṭah, Kelsih, Hlimen, Aizawl, Dàrlawng, Lamtual, Saitual, Puilo, Vanchéng, Awnnu, Tualte, Lungdâp, Champhai, Kelkang, Dîltlang (Kanghmun), Lungfai leh Khuanglamte a ni.
Sailo lal Lalsavunga, Vanhnuailiana leh Liankhama te hun laia an pasaṭha a ni a, a hun hnuhnung lam chu N. Diltlang (Kanghmun) leh Khuanglàmah a hmang. N.Diltlang hi Hnahlan lal Saiṭhuama ram chhung a ni.
Vanapa Thlan Sub-Committe hruaitute chuan, Vanapa chu N. Diltlang rama a awm laiin a thi a, Tuiṭhoh kamah phûm a ni tih sawiin, "Tun thlengin a thlân lung pawh hmuh turin a la awm. A thlân lung hi hmanlai pasalṭhate lungphun dan dik takin, an mi thah leh sa kahte zat chiah lo mah se, lung pakhat mai ni lo an phun tlar a ni," an ti.
Vanapa lu nghahna hmun chu Tuiṭhoh lui kam a ni tih chu Mizo thil hlui chhui mi hrang hrangte chhui dan a nih thu sawiin, Vanapa Thlan Sub-Committe hruaitute chuan, "Tuiṭhoh lui kam tuna a thlân awmna hmun ngeiah hian phûm a ni tih hi archaeological evidence chiang tak a awm a ni," an ti a; Vanapa chu Diltlanga a awm laia hmutu ngeite sawi hriat tur pawh a awm thu an sawi.
Vanapa tuchhuan C Ṭhasiama, Bawngkawn, Aizawl chuan, anmahni thlahtu hmasate aṭanga ṭawngkaa an inhrilh chhâwnna kal zel aṭanga an hriat danin, Tuiṭhoh lui kam chu a pu Vanapa thihna leh lu nghahna a nih thu a sawi a, "Vanapa thlân hi Hnahlan ram Tuiṭhoh kama mi lo hi chu kan pawm lo a, mi tu pawhin hmun dangah a awm an lo tih pawhin, kei ni chhungkua chuan kan pawm lo a ni," a ti.
C Ṭhasiama chuan, Tuiṭhoh lui kama mi ni lo chu Vanapa thlân awmna anga sawi tawh lo turin Mizo mipui a ngen a; Mizoram hmun hrang hrangah Vanapa hming chawia hmun, hall, veng leh leh YMA section hmingte phuah a ni chu an lawm thu a sawi bawk.