Minister leh MYC Chairman bânna Party leh pawl dangte'n lawmawm an ti

Congress party, BJP Mizoram Pradesh ṭhalai leh pawl dang ṭhenkhatin thuchhuah siamin, minister of state Lalrinmawia Ralte leh Mizoram Youth Commission (MYC) chairman T Sangkunga ten an nihna aṭanga bànna an thehlut chu lawmawm an tih thu an tarlang.

MPCC chuan, NIAS-a zirlai 32 thawn chungchanga harsatna kal zelah eptu pawlte'n Labour, Employment & Industrial Training (LEIT) minister Lalrinmawia Ralte leh MYC chairman T Sangkunga te chu báng tura nawrin, an pisa kai tur an dang tih an sawi a, "Boruak ṭha lo zawk leh buaina sang zawk a awm loh nan leh thil chhui a awl zawk nana an nihna huaisen taka an bànsan ngam hi fak phû hlein kan hria," an ti a; CM Lal Thanhawla kaihhruai sorkarin thil ṭha a duhzia a tilang niin an sawi.

Chief Minister-in MSU din champha lawmnaah, 'NIAS-ah an lo tisual hle a, a pawi kan ti,” tia sawi a, Mizoram Building & Other Construction Workers Welfare Board sum hman dana sorkar dik lohnate a pawm leh huai taka a sawi chhuak ngam chu chhuanawm an tih thu an sawi a, "Thil dik lo palzam mai mai duh lo, siam ṭhat ngai siam ṭhat zel duhtu CM kan nei hi Mizoram tan vanneihna leh Pathian malsawmna hlu takah kan ngai," an ti.

Mizoram BJP ṭhalai, Bharatiya Janata Yuva Morcha chuan, Lalrinmawia Ralte leh T Sangkunga ten bànna an thehlut chu lawmawm an tih thu an sawi rualin, "Mawhphurhna hlen ngam loa an hnuaia officer-te an suspend hmasa rum rum te, insawifiah phêt an tum leh office kai tur dan bakah, kawngzawh leh sit-in demonstration ngai hial khawpa hun rei tak luhlul an chhuah kha kan dem," an ti. NIAS, Kolkata-a zirlai harsatna tawkte chu zangnadawmna pe ngei turin sorkar an phût a ni.

Students’ Self-Support Union (SSU) pawhin LEIT Minister leh MYC Chairman ten banna an thehlut chu lawmawm an tih thu tarlangin, "An enkawlna hnuaia thil dik lo nasa tak thleng meka mawhphurhna laa an báng ngam hi kan lawm tak zet a ni," an ti a; vocational training provider leh zirna in thlan danah te, ram páwna zirlai tirh chhuah chungchangahte fimkhur lehzual turin sorkar an ngen.

SSU chuan, LEIT department leh MYC kaltlanga hmun hrang hranga training chhuakte dinhmun en zui turin sorkar an ngen a; NIAS bakah, LEIT department, MYC leh Workers Welfare Board kaltlanga skill development buaipui dan te, dik lo taka sum hman a nih dante chu Magisterial Enquiry dina chhui chhuak vek tur leh, a mawhphurtute dan anga na taka hrem turin an ngen bawk.