KHAWTHLIR
Dan inzirtir
Mizoram State Commission for Women chuan, nimin khan East Lungdar-a Thangbura Hall-ah dan lam inzirtirna, Legal Awareness Programe an buatsaih a, Mizoram State Commission for Women chairperson Vanlalawmpuii Chawngthu, bialtu MLA-in a hmanpui. He hunah hian State Commission for Women member leh advocate T Lalnunsiama chu resource person a ni a, hmeichhia leh naupang humhalhna dante a sawifiah.
Lirthei dah khap
Traffic SP chuan thupek chhuahin, emergency fire service motor tlân chhuak turte'n harsatna an tawh ṭhin avangin Hunthar Veng leh Fire & Emergency Service office inkar kawng phei kawng sira lirthei dah a khap.
MRB branch thar
Baktawnga Mizoram Rural Bank branch thar chu nimin khan Serchhip DC Dr Lalrozama'n a hawng. Baktawnga MRB branch thar hi MRB branch 83-na a ni.
Inthlan atan inbuatsaih
Mara Autonomous District Council inthlan tura inbuatsaih lâwkna atan, nimin khan Siaha DC conference hall-ah 'Programme for AERO/DO Training Inconnection with Summary Revision of MADC Electoral Roll, 2017' tih thupui hmangin training buatsaih a ni a; inthlan atana pawimawh hrang hrangte AERO/DO-te zirtir an ni.
Flowers fair
Siaha DC conference hall-ah nimin khan District Level Flowers Exhibition Cum-Fair buatsaih a ni a, Horticulture director R Zotawna'n a hawng. Fair-ah hian pangpar chíngtu mi 34-te'n pangpar 1,159 an pho chhuak a ni.
ASHA training
Nilaini khan Lawngtlai DC conference hall-ah ASHA-te tan Village Health Sanitation & Nutrition chungchang zirna buatsaih a ni a, Lawngtlai CMO Dr Thani Pachuau-in a hmanpui. Lawngtlai district-ah hian khaw 168-ah Village Health, Sanitation & Nutrition Committee din a ni a, ASHA 178 an awm a ni.