Kolasib-ah sorkar hna thawh hrang hrang thlirho

Kolasib District Coordination & Monitoring Committee chu, nimin khan an chairman CL Ruala, Lok Sabha MP hoin an ṭhukhawm a, sorkar laipui scheme hnuaia hmalak dante an thlirho.

CL Ruala chuan, Kolasib district-ah sorkar laipui scheme hnuaia hamṭhatna dawng tur thlanna felfai taka kalpui a ni ṭhin chu entawntlak a tih thu a sawi a, district dang tana entawn tlaka hma la zel turin a chah.

Co-chairman Ronald Sapa Tlau, Rajya Sabha MP pawhin, district-a sorkar hnathawkte chu sorkar scheme hrang hrang a taka kalpuitu an ni tih hria a, tha thlah loa kalpui zel turin a chah.

Meeting-a tarlan danin, Swachh Bharat Mission (Urban) hnuaiah bawlhlawh sawngbawlna (solid waste management) tur Dihmun Tlangah sak mek a ni a; khawpuiah páwn lama inthiar an awm hriat a ni lo a, ek-in thianghlim tâwk lote sak ṭhat a ni.

National Social Assistance Programme hnuaiah Indira Gandhi National Old Age Pension Scheme-a kum 80 chung lam 1,091 leh kum 60-79 inkar 263 hnenah sem a ni.

SSA hnuaiah kum 2016-17 chhungin naupang sikul lut lo 495 hnenah special course hmangin Phaisen, Saiphai, Pangbalkawnah leh Kolasib Diakkawnahte Non Residential Special Training Centre siam a ni.

National Health Mission chhinchhiah danin, October 2016 aṭanga tun thlengin nau nei 321 awmin, naute 317 chu damin an piang chhuak a, damdawi-in ni loa piang 21 an awm. MGNREGS hnuaiah job card nung 18,293 a awm a, sorkar kum kal mekah ni 17 inhlawhna siam tawh a ni.

National Rural Drinking Water Programme hnuaiah kum 2015-16 chhungin khaw 40-ah hmalak a ni a, NLCPR hnuaia hmuh cheng nuai 780.4 sênga sak Bilkhawthlir (Pumping) Water Supply Scheme chu December 9, 2016-ah hawn a ni.