MPC-in minister bân ngai pawi an ti

MPC party office bearer-te nimina an pisaa president Lalhmangaiha Sailo hoa ṭhukhawm chuan resolution pass in, mipuiin rorel tura an thlan tlinte'n rorelna dik an kenkawh loh vanga an bân a ngai ṭhin chu vanduaithlak an tih thu an tarlang.

MPC chuan, "Term khat chhung leka mawhphurhna neitu pathum lai minister/chairman-te'n bànna an thehluh a ngai hian tuna sorkar lai ṭawpzia a tilang chiangah kan ngai a, bànna thehlut ve lote ngei pawh hi báng tate aia an ṭhat kan ring chuang lo. Tuna roreltute hi hmangaih taka ram roreltu an ni lo tih a chiang hleah kan ngai," an ti.

MPC party chuan, mipuite chu ram hruaitu thlanah fimkur tura chahin, "Rorelnaa ṭhu tawh case nei leh hming hliau reng reng chu thlang lo ngam turin mipuite kan ngen a ni," an ti a; eiru leh hlemhle lo, hmangaihna nena ram roreltu tur, lalna leh thuneihna ringawt âtchilha ram siamna kawnga ke pên tak tak si lote chu hnâwl ngam tawh turin mipui an ngen a ni.

Kum 2018-a inthlanpui awm turah sorkar thar, mipuite beisei leh nghahfâk siam ngei turin chak takin hma an la mek tih sawiin, MPC chuan, "MPC party chuan ram veitu, ram tana mi ṭhahnemngai tak tak pawl hrang hrangte aṭanga rorelna khawl thar chelhpui tura a sawmte nen hrui khat vuanin thawhhona thuthlungte siamin hmalakna kalpui mek a ni," an ti bawk.