Bualpui Cheraw ni loin, Buhza Aih Cheraw

Hnahlan Welfare, Aizawl hruaitute chuan, tunlaia Cheraw chi khat, Bualpui Cheraw tih chu a dik lo a, Buhza Aih Cheraw a nih thu an sawi a; he Cheraw hi Hnahlan aṭang tihchhuah a nih thu an sawi bawk.

Nimina Aizawl Press Club-a thuthar thehdarhtute an kawmnaa Hnahlan Welfare, Aizawl hruaitute sawi danin, Buhza Aih Cheraw hi Hnahlan khuaah kum 1975 velah an ching ṭan a; kum 1978-ah Hnahlan YMA-in mumal taka an tih hnuah Mizoram hmun hrang hrangah a darh a ni.

Mizo lo neih dana lo vah, buh tuh, hlo thlawh, buh seng, buh chil, hruih záwla buh si zah leh buh thar lawmna thlengin làmah hian entir a ni.

October 16, 1979-ah Hnahlana Health minister PB Rosanga a zin ṭumin an lo entir a, chumi hnuah hmun dang dangah an entir ṭhin.

August 29, 1991-a Central YMA leh Art & Culture depart­ment-in Aizawla YMA Cultural Meet an buatsaihah Buhza Aih Cheraw chu Hnahlan YMA-in an entir a; chumi ṭum vek chuan NE Bual­pui Branch YMA-in an entir ve bawk. NE Bualpui chu pakhatna an ni zui a, chuta ṭang chuan Bualpui Cheraw tia sawi leh hriat a ni ta zawk niin an sawi.

NE Bualpui YMA-in Buhza Aih Cheraw an lo thiam dan chu, Hnahlan khaw mi Zoramchhani w/o Lalrin­puia (NE Bualpui)-in a zirtir vang niin an sawi.

Press Conference-ah hian Zoramchhani chuan, kum 1988-ah NE Bualpuiah pasal a nei a, a pasala pa leh NE Bualpui YMA hruaitute'n Buhza Aih Cheraw chu zirtir tura an ngen avangin a zirtir tih a sawi a, "August 28-29, 1991, Nilaini leh Ningania Lammuala cultural dance inelnaah Bualpui chu he Cheraw hmang hian pakhatna an ni a, heta ṭang chiah hian mi ṭhenkhatin Bualpui Cheraw tiin an lam ta a ni... Pakhatna an nih khan ka chungah an lawm thu leh pakhatna an nih tak dan lehkhain min rawn hrilh," a ti.