Swab sample test result hriat har vangin Siaha leh Mamit dist-ah chaw an nghei

Siaha district-a state páwn aṭanga rawn haw, quarantine facility hrang hranga awm mekte leh anmahni thláwptu mi 600 velte chuan swab sample test result chhuak har lutuk leh an dinhmun an hriat har lutuk avangin nimin zing aṭang khan lungawi lohna lantirin chaw an nghei.

Siahaa journalist-te hnen aṭanga thu dawn danin, chaw an nghei chhan hi swab sample result chhuak har leh an dinhmun an hriat har lutuk vang bakah, hmun ṭhenkhatah chuan thuneitute'n

an enkawl dan a ṭha tâwk loa an hriat vangte a ni.

Siaha MJA president Bathai chuan, Siaha district-a chaw ngheite chu quarantine centre-a awm mekte bakah, a chhuak tawhte pawhin thláwpin an nghei ve tih a sawi a, "Chaw nghei zat tak hi hriat theih a ni lo a, Thawhṭanni zan lama nghei tura in report zat chu mi 577 an ni," a ti. He thu ziah lai thleng hian chaw nghei an tihtawp thu hriat a la ni lo.

Mara Students Organisation (MSO) hruaitute chuan chaw ngheitu quarantine centre hrang hranga awmte chu nimin zing khan an tlawh a; quarantine facility-a awm mekte hmalakna leh thil tih chu an thlàwp tlat thu leh a ṭul anga an thil phûtte tihhlawhtlin a nih theih nan sorkar nawr an tum thu leh, a ṭul chuan hunger strike pawh an ṭawmpui ve tur thu an sawi.

Hetih lai hian, ZMC-a swab sample test result nimin zinga tihchhuah zingah Siaha district-a mi 468 (mipa 241 leh hmeichhia 227) an tel a; result la chhuak lo mi 56 an la awm. Nimina result chhuakte chuan Covid-19 an kai lo vek a ni.

Siaha-a Lorrain English School-a awm mek mi 119-te leh Presby­terian School-a awm mekte erawh chu an zingah Covid-19 vei an awm tawh avangin swab sample lak ṭhat leh a ni ang. 

Siaha district-a chaw ngheite zinga mi chuan, nimina test result chhuakah khan sample lakna rei deuh tawh ho chu an tel kim thawkhata an ngaih thu a sawi a; chaw nghei zat chu mi 700 vel ni tura an ngaih thu a sawi bawk.

Mamit district-ah chuan, quarantine facility hrang hranga awm, swab sample lâk tawh, tun thlenga test result la hre lo mi 116-te chuan nimin zing khan chaw an nghei a; sorkar hotute'n thil awm dan an hrilhfiah hnuah an chaw nghei an titawp a, nimin tlaiah chuan zanriah a pangngaiin an ei leh nghal nia thu dawn a ni.

Mamit aṭanga thu dawn danin, Mamit district-a sample test result nghak mekte hian quarantine-a an awmnaah harsatna leh sawisel an nei hranpa lo. Mahse, result an hre har lutuk chu mi tam takin hrehawm an ti a, quarantine hun chhung ni 21 awm tling tawhte pawhin result a chhuah loh avangin an chhuah theih loh phah thu leh, ni 21 chuang awm tawh mi eng emaw zat an awm thu an sawi.

Vanglaini palai zawhna chhangin Mamit DC Dr Lalrozama pawhin, quarantine facility-a awm zinga ṭhenkhat chu ni 24/25 vel awm tawhte an nih thu a sawi a; tun dinhmunah state pawn aṭanga haw zingah swab sample lak loh an nei tawh loa a hriat thu sawiin, "Mamit district-ah positive mi 18 an awm a, pakhat chu ZMC-ah awmin, a bak zawng chu CCC-ah an awm. CCC-a awmte zingah sample test nawn an la awm lo," a ti.