Guwahati aṭangin tuialhthei leh buhfai Lirthei hmangin lâk luh a ni dawn ; Mi tin kan inrenchem a ngai - FCSCA Minister

Food, Civil Supplies & Consumer Affairs (FCSCA) minister K Lalrinliana chuan, Guwahati aṭangin lirthei hmangin tuialhthei leh buhfai lak luh a nih tur thu a sawi a; inrenchem turin Mizoram mipui a ngen.

Vanglaini palai zawhna chhangin K Lalrinliana chuan, tun hnaia tuilianin Assam-ah rél kawng a tihchhiat avangin Silchar aṭangin tuialhthei leh buhfai lâk theih a ni rih lo tih sawiin, "Rél kawng hi engtikah nge siamṭhat a nih dawn hriat theih a ni lo a, hun a la duh rei a rinawm. Chuvangin, tuialthei leh buhfai lak luh dan kawng dang kan zawn a ngai ta a ni," a ti.

Supply Minister chuan, Guwahati aṭangin buhfai leh tuialhthei lâk a ngai rih dawn tih sawiin, "Tun dinhmunah chuan Meghalaya-ah lei a min avangin kal theih a ni rih lo a, kawng an siamṭhat theih thuai beisei a ni. A phurh man a to bakah, a thang chhung a rei deuh dawn," a ti a; FCI pawhin lirthei hmanga buhfai phurh rih an tum thu a sawi.

K Lalrinliana chuan, Bangladesh lam aṭanga Tripura kaltlanga tuialhthei leh buhfai phurh luh dan tur pawh dap a nih thu sawiin, "Sorkar laipui phalna a ngai thung. External Affairs Minister hnenah a rang lama hma min laksak turin thlen a ni," a ti.

Tuialhthei chu a awm sa mipuiah sem rual mek a nih thu sawiin Minister chuan, "Mipui kan inrenchem a ngai hle. Guwahati aṭanga phurh luh theih a nih pawhin tun hma angin stock a tam thei dawn lo," a ti a, rél kawng siamṭhat a nih hma chuan tuialhthei chu khuahkhirh a ṭul a rin thu a sawi.

FCSCA Minister chuan, buhfai dinhmun a chhiat lutuk loh thu sawiin, "Fûr laia kawng a ṭhat loh thulha harsatna tâwk thei kan ni a, monsoon stock kan dahna hmunah thla 3-4 tla an nei. Fûr lai pawha kawnga harsatna a awm ngai loh avanga monsoon stock kan tih ngai lohna hmunah erawh chuan harsatna a awm palh thei. Theihtawp chhuahin hma kan la a ni," a ti.

Supply Minister ho hian nimin khan a pisaah FCSCA department hotu te, Food Corporation of India (FCI) leh Indian Oil Corporation (IOC) hotute an ṭhukhawm a; Mizorama buhfai leh tuialhthei lak luh a khaihlak dan leh mipuiin an tawrh lutuk lohna tura hmalak dan tur an sawiho.

Ṭhutkhawmah hian FCSCA leh FCI-te buhfai chhêk khâwl dinhmun enho a ni a; report-a a lan danin, mipui hnena ration buhfai pek kawngah harsatna a awm rih dawn lo tih sawi chian a ni.

IOC aṭangin tuialhthei (POL) report ngaihthlak a ni a; IOC hotute chuan, diesel (HSD) chu Ramnagar Oil Depot-ah a tam thu leh Mizorama lak luh kawngah harsatna a awm loh thu an sawi.

Petrol erawh chu Ramnagar Oil Depot-ah a tlem avangin Guwahati aṭanga la turin oil tanker 30 Silchar-ah an awm tawh thu an sawi a; Borkhola Gas Bottling Plant aṭanga thu dawn danin, gas (LPG) supply-ah chuan harsatna a awm rih lo tih an sawi bawk.