Aizawla damdawi dawr 118 endik
Aizawl district-a Nasha Mukt Bharat Abhiyaan (Drug Free India Campaign) kalpui mekah Task Group chairman Lalruaia, Aizawl SP kaihhruaiin May 18, Nilaini khan Aizawl khawpuia damdawi dawr 118 endik a ni.
Tunlaiin ṭhalai, a bikin kum tling lo (kum 18 hnuai lam) zingah damdawi ruih theih hman sual a hluar hlea hriat a ni a; ruihhlo chungchanga hma la turin Aizawl SP kaihhruai task group din niin, task group-te chuan kawng hrang hrangin hma an la mek a ni.
Damdawi dawr endik tur hian task group member-te chu hlawm thumah inṭhenin, Aizawl hmun hrang hranga damdawi dawr 118 an endik a; damdawi ruih theih chite chu kum tling lo hnenah hralh lo tur leh doctor chawhna (prescription) lehkha tel loa hralh chhuak lo turin an hriattir a ni.
Task group-te chuan, dan lo leh doctor lehkha tel loa damdawi hralh chíng an awm chuan hrem theih an nih thu leh an drug license thlenga tihtawp theih a nih thu an hriattir bawk.
Task group-ah hian Police, Excise & Narcotics, Food & Drugs Administration, School Education leh Social Welfare lam mite leh Mizoram Chemist & Druggist Association aiawhte an tel a ni.