Oil & gas zawnnaa lei verh kaihhnawihah DGH-in Mizoram dinhmun a rawn zâwt

Mizorama tuialhthei (oil) leh gas zawn hna thawktu Oil India Limited-in hna an thawh chhunzawm dan turah sorkar laipuia Directorate General of Hydrocarbons (DGH) chuan Mizoram sorkarah inkalpawhna kawng dinhmun a rawn zawt a, Geology & Mining department-in Mizoram sorkarah chhànna a thehlut tawh.

Geology & Mining hotute chuan Vanglaini palai zawhna chhangin, hna thawh chhunzawm phalna petu tur DGH chuan Oil India tan bik hma a rawn lak thu an sawi a, "Oil India hian Pangzawl leh Thiltlang inkar ramah lei verh hmabak a nei a, DGH hian Mizoram Chief Secretary hnenah ziakin verhna tur hmuna tun dinhmuna inkalpawhna kawngpui dinhmun an rawn zawt a ni," an ti.

Geology and Mining department hotute chuan, DGH hnena chhan­na tur chu Geology & Mining-in an bawhzui a, Chief Secretary hnenah chhanna tur an thehluh tawh thu an sawi.

Pangzawl leh Thiltlang kalpawhna tur kawngpui NHIDCL-in an khawih mek thu sawiin Geology & Mining hotute chuan, "NHIDCL hotute kan bia a, blacktoping & hardening an la zawh loh avangin fûr lai tih loh chuan lirthei lian tan tlân theih a nih tur thu min hrilh a, chutiang chuan sorkarah chhanna kan pe," an ti.

Oil India-in lei verh turin bungrua leh lirthei lian tak tak an lak luh a ngaih dawn avangin DGH chuan hnathawh hun pawhseina license an pek hmain inkalpawhna kawngpui chungchang an rawn zawt hmasa tih an sawi a ni.

Tarlan tawh angin, Oil India hian May 22, 2007 aṭangin Mizoramah oil leh gas zawn hna an thawk a, sq.km. 3,619 vela zauah khur panga verh tur an neih zinga pali an verh tawh a, chu'ngte chu - Maubuang, Keifang, Thenzawl leh Phulmawi ramahte a ni. May 21, 2021 khan Oil India license a tàwp a, verh tur pakhat an la nei a ni.