ZPM hi beidawngte beiseina awm chhun a ni - Lalduhoma

ZPM leader Lalduhoma chuan, ZPM party chu ram tana beidawngte beiseina awm chhun a ni tawh nia sawiin, mipui an tibeidawng thiang lo tih a sawi.

Lalduhoma hian Hachhek bial a fang a, May 18, Nilaini khan Zawlnuam Ṭhuampuiah leh zanah Kanhmunah thu sawiin, nimin khan Thinghlun leh Luimawi khuaah thu a sawi a, "Ram tana beidawngte beiseina awm chhun kan ni ta a, keini chuan mipui kan tibeidawng thiang lo. Kan kalna apiangah mite thinlung min hnehsaktu a awm a, chuvangin, chapo thei kan ni lo," a ti.

An party zawm tharte chu party-ah ni loin, policy-ah rinawm tur a nih thu sawiin Lalduhoma chuan, "Mizoram tihsual chu party-a rinawm tura kan inzirtir hi a ni. Ram hruaitute'n ram an phatsan chuan kan bànsan hmak tur a ni a, policy pên bosantute tui lo chunga zui hi mipui bat a ni lo. Ram leh mipui tana intiamna hlen lo kan zui reng hian ram kan tichhe tláng a ni," a ti a; ram hlui zia paihin, kalphung thar, mipui sorkar siam turin mipui a sáwm.

ZPM Leader chuan, an policy chu vawi eng emaw zat an aupui tawh tih sawiin, "Kan kal thui ta, kan kal zel chuan thlen hun kan nei ang. Zoram chhim leh hmar, chhak leh thlangah lawm luh tur kan nei reng. Zoram dung leh vângah politics-a harh tharna a thleng a, mipuite'n session kan ngaihven a, ram kan vei a, MNF ni lo, Congress ni lo, mipui sorkar din kan duh tawh a ni," a ti.

MNF hotute rorel dan a mak hle nia sawiin Duhoma chuan, "An party worker-te ngei pawh an hruaitu báwr kal dan avangin an rilru a ná a ni. Rorel lai party an nih avangin nakkum inthlanah candidate ṭha tak tak an rawn nei leh mai thei, mahse, an hruaitu en ila, chief minister atana kan duh ber party candidate vote turin ka ngen che u a ni," a ti a; ram leh hnam hmangaihtute chu ZPM-a kal khawm turin a sáwm.

Lalduhoma chuan, ZPM-in 'Kalphung thar' an tih chu tih dan dang, kalphung thlâk a ni tih sawiin, "Mihring kan inzuar lo a, kalphung ṭha hnuaiah mihring an ṭhat mai avangin kalphung thar kan zuar a ni. Sorkar kan hrawn tawhte hi party sorkar an ni a, kan society a ei chhia a, kohhran a nghawng a, kan mangang zozai ta a ni. Hei hi tuam dam turin ZPM chuan mi zawng zawng ta tur, inthliarna awm lo sorkar siam kan tum a ni," a ti.

ZPM thuchhuah chuan, ZPM Leader hian Zawlnuam Ṭhuampuiah an party zawm thar mi 874 a lâwm lût niin a tarlang.