Covid-19 vei hmuh belh lo Vei tawh zingah negative mi 60 an awm

Zoram Medical College (ZMC) Covid-19 laboratory-ah June 22, Thawhṭanni khan Covid-19 hripui vei hmuh chhuah a awm lo a; hripui vei tawh zingah vei tawh lo hmuh chhuah leh damdawi-in aṭanga chhuahtir mi pariat an awm thung. Heti hian, Mizorama Covid-19 vei tawh zingah mi 82-in an la vei mek a, mi 60-in an vei tawh lo.

SRH-ZMC Bulletin report-a a lan danin, June 22 khan mi 583-te swab sample endik zingah hripui vei an awm lo a; endikte chu State Referral Hospital-a awm sate bakah, Aizawl, Lunglei, Siaha leh Mamit district aṭanga sample an dawnte a ni. Nimin khan swab sample eng emaw zat endik leh a ni a, vawiin lamah result hriat theih beisei a ni.

June 22-a endik zingah Covid-19 vei hmuh chhuah tawhte swab sample endik nawn a awm nual a, Lunglei district-a mi pakhat chuan hripui a vei tawh lo tih hmuh chhuah a ni. Nimin (Thawhlehni) khan Covid-19 vei SRH-a enkawl zinga mi pasarih - mipa pali leh hmeichhia pathum chuan hripui an vei tawh loh avangin damdawi-in aṭangin an chhuak a; chu'ng mite chu Aizawl district mi panga, Kolasib leh Saitual district mi pakhat ve ve an ni.

Heti hian Mizorama Covid-19 vei hmuh chhuah tawh mi 142 zinga mi 60 chuan an vei tawh lo tih hmuh chhuah a ni tawh a, mi 82-in an la vei mek thung. Hripui vei tawh lo zinga mi 19, SRH-a enkawl mekte chu chhuahtir an ni tawh a, mi dang 41-te chu an district ṭheuha Covid Care Centre (CCC)-ah an la awm thung.

SRH-ZMC Bulletin chuan, Covid-19 vei damdawi-ina enkawl mek mi 30 zingah harsatna nei an awm loh thu a tarlang a; nimin khan hripui vei rinhlelh thilah mi pakhat dah luh thar a nih thu a tarlang bawk.