Mipuiin chhiah pein an tih tur an ti ; Sorkarin a tih tur a tih ve a ṭul - Congress ṭhalai

Mizoram Pradesh Youth Congress Committee (MPYCC) chuan thuchhuah siamin, Mizoram sorkarin mipui a sâwr fû mek laiin, sorkarin mipui tana a tih tur a tih ve a ṭul thu an tarlang.

MPYCC chuan, tun hnaiah Mizoram sorkarin chhiah a lâk luh a pun nasatzia leh hma a sawn nasatzia sawi a ni tih tarlangin, “Chhiah petu Mizoram mipui, sumdawng leh a dangte’n rinawm taka chhiah an pe zel tih Taxation Minister-in a sawi a. Mipui lam chuan an tih tur an ti a, sorkar lamin a tih tur a tih ve thung a ngai a ni,” an ti.

Congress ṭhalaite chuan, diesel leh petrol chhiahah mipui sawr fû mek a nih thu te, electric bill mi tam zawk tan phurrit ni khawpa an san mek thu te, health care atan mipuiin sum an thawh ve tur a bin thawka tihpun a nih thu te, property tax tihsan zel a nih thute an tarlang a, “Mipui hi sorkar hian min sáwr fû tak meuh meuh a ni,” an ti a; Taxation Minister-in hahípa ti ṭha a intih lai mekin Mizoram mipui an rûm mek thung niin an sawi.

MPYCC chuan, pension hlawh la thei lo leh GPF la thei lo tam tak an awm thu te, health care atan mipuiin a hun takah premium an pek laiin an bill a tàn reng thu te, MNF sorkarah tender chhuah loa hna inpek a tam thute an tarlang a, “Kan state-in sum a pawh luh tam tual tual laiin, a enkawlna lamah kan sorkar hi a hlawhchham em avang leh a duhsak zawngte tih lawm nan Non Plan Expenditure a san lutuk avangin Mizoram mipui sum tur hi mipuiah a thleng pha tawh lo a ni,” an ti.