Minister-in Bungzung H/S jubilee a hmanpui

Bungzung High School chuan nimin khan sikul tualah an kum 50 tlinna, golden jubilee an lawm a, minister of state TJ Lalnuntluanga leh bialtu MLA Ramthanmawia ten an hmanpui.

TJ Lalnuntluanga chuan, Bungzung H/S-in golden jubilee lawm theia Pathian hruaina a dawng chu a lawmpui thu a sawi a; zir thiamna chu din khawchhuah theih nana kawng tinrenga thiamna nei tura inzirna a nih thu sawiin, zirlaite leh zirtirtute chu an sikul aṭanga rilru sûkthlêk dik leh hrisel zir chhuak ngei thei turin a fuih.

Hmasawnna karah tunlai thiamna changkang leh chak tak avanga harsatna awm theite ngaihven fo a ṭul thu sawiin Minister chuan, "Hmasawnna tluantling awm tur chuan kan khawtlang nunphung leh hnam ziarángte nena inmil zela kal a ngai. Social media kaltlanga thu dik zîktluak lo hmanga mi dang beihna thehdarh a ni ṭhin hi a veiawm a, ngaihtuahna dik leh rilru hrisel kan put hmasak a pawimawh," a ti.

TJ Lalnuntluanga chuan, "Lehkha thiam chauh emaw, kan zirlaia kan pass ṭhat chauh emaw hian hmasawnna a háwl kim tâwk ṭhin lo. Sikul aṭanga thiamna hrang hrang, zirlai bakah nunphung thlenga kan zir ṭhin hian nun dan dik min kawhhmuh ṭhin a ni," a ti bawk.

Ramthanmawia pawhin thu sawiin, "Zirna tel loin mihringin hma a sawn thei lo a, khawtlang pawhin hma a sawn thei lo a ni," a ti a; zirna lama ṭan la sauh sauh turin Bungzung khaw mipui a chah.

Bungzung H/S hi January 16, 1970-ah din a ni a, hripui léng avanga a hun taka jubilee an lawm theih loh hnuah nimin khan an lawm a ni. Golden jubilee lawmnaah hian sikul dintu zinga la dam te, HSLC pass tharte leh an sikul aṭanga sorkara group A officer ni tawhte chawimawina hlan a ni.