Kolasib-ah NMMS chungchang zirho

Kolasib IPR conference hall-ah nimin khan Mahatma Gandhi National Rural Employment Guarantee Scheme (MGNREGS) hnuaia hna hrang hrang thawktute vilna tur, National Mobile Monitoring System (NMMS) chungchang inzirtirna buatsaih a ni a, Kolasib DRDA project director R Lalnghakliana’n a hawng.

R Lalnghakliana chuan, khawtlang hmasawnna hna thawk tura sorkarin ruahmanna a siamte bêl chiang peih turin khawtlang hruaitute a chah a, “Kalphung thar awmte zir thiama theihtawp in chhuah a ṭul. Khawtlang hruaitu hmangchang hria leh inzir peih mi kaihhruaina hnuaiah chuan khawtlang hmasawnna hna pawh kalpui a sâwt ṭhin,” a ti a; NMMS chu ṭangkai taka hmangtu nih tum ṭheuh turin a chah.

NMMS hi mobile phone aṭanga hman tur niin, MGNREGS hnate langtlang zawka thawh a nih theihna tura duan a ni a; MGNREGS hnuaia hna thawktute kal dan a hmun ngeiah chhinchhiah a nih dawn bakah, a viltu VEC/VLAA/Mates-te tan hna thawktu hming chhinchhiahte MGNREGS software-ah rang zawkin a thawn theih dawn a ni.