KHAWTHLIR

Ar notê sem
FOCUS Project hnuaiah AH&Vety department chuan May 17, 2022 zan khan Champhai district-a khua/veng 16-a ar vulh tura thlan mi 200
hnenah rainbow rooster ar notê 20 an sem a; ar chaw, ar chaw pekna leh tui peknate an sem nghal bawk.

MLA-in ṭanpuina pe
Aizawl South-II bialtu MLA Lalchhuanthanga chuan nimin khan Salem Veng Primary School tlawhin, class room-ah zirlaite an len loh avanga inkal chhâwk ngai ṭhin chu zirtirtute ngenna angin sikul sak belhna tur MLA fund aṭangin a pe a, hna thawh bul ṭanna a enpui. Computer leh printer a pe nghal bawk. MLA hian HSLC 2022 top 10-a a bial chhung mi lang pathumte hnenah lawmpuina Rs 10,000 ṭheuh a pe bawk a ni.

OET coaching hub
Nurse-te India ram páwna thawk thei tura sap ṭawng exam paltlang ngai Occupational English Test (OET) Coaching Hub, MOCH chu nimin khan Chhinga Veng, Aizawlah hawn a ni a; Mizoram Nursing Council leh RIPANS aiawh te, nursing school principal 10-te leh Health Services-a Nursing hotute bakah, registered nurse-te leh an chhungte an tel. Aryavrat Healthcare, UK-a managing director Dr Shashi Baliyan leh hotu dangte'n online hmangin an telpui bawk.

Training khâr
Aizawl District Disaster Management Authority (ADDMA) leh Aquatics Association of Mizoram ten 'Water Rescue and Retrieval of Drowned Victims Training' an buatsaih chu nimin khan khâr a ni a, kharna hun hi Aizawl bawrhsap Dr Lalhriatzuali Ralte-in a hmanpui. Bawrhsap hian training-a telte hnenah life jacket a hlàn a, mahni awmhmun ṭheuhah chhiatna tâwkte ṭanpui tura theihtawp chhuah tur leh ruih theih thil laka invawng uluk turin a chah.

SEDP Committee
Siaha District Socio-Economic Development Policy (SEDP) Committee chuan nimin khan an chairman Lalsangliana, district bawrhsap hoin DC conference hall-ah Village Level SEDP Committee din dan tur an sawiho. May 27, 2022 aia tlai loah Village Level SEDP Committee list-te DC pisaah thehluh vek ni se, an ti.

Online-a tih tur
Tourism department hmunhma hrang hranga kal duh leh thleng duhte tan online hmanga hauh lawk (booking) tih vek tawh tur a nih thu Tourism department chuan thu chhuah siamin a tarlang.

Sports hawng
Khawzawl district bawrhsap CC Lalchhuangkima chuan nimin khan Khawzawl Vengthar YMA Hall-ah Khawzawl Officer’s Club (KOC)-in sorkar department hrang hranga thawkte puala an buatsaih, Inter-Department Sports 2022 a hawng. Sport hi vawiinah chhunzawma zawh a
ni ang.

Myanmar zu man
Champhai police leh Assam Rifles-te chuan May 18, Nilaini khan Champhai leh Darkhai (Myanmar) inkarah 207 pick-up aṭangin Myanmar zu ûm 3,956 (ml. 365) an man a, a neitua puh Lalhunliana (42) s/o Lalthlengliana leh Lalsawithanga (25) s/o Phairomawia, Hnahlan khua ve ve nia inchhálte pawh an man bawk. Zu hi Rs 1,97,700 man a ni.

MDEE pawtsei
Higher & Technical Education department chuan Mizoram Diploma Entrance Examination (MDEE), 2022 atana exam dilna thehluh hun tàwp chu June 6, 2022 thleng a pawtsei a, exam hun pawh June 9, 2022-ah a sawn hla bawk.