Ni 17 chhung hripui vei thi an awm tawh lo

May 18, Nilaini khan swab sample 282 endik aṭangin Covid-19 vei mi 26 hmuh chhuah a ni a, positivity rate 9.22% a ni. Nimin khan hripui vei dam tawh mi 42 chhuahtir an ni a, hripui vei thi an awm lo a, ni 17 chhung thi an awm tawh lo.

Nilainia Covid-19 positive hmuh tharte chu mipa 11 leh hmeichhia 15 an ni a, TrueNAT hmanga hmuh chhuah pakhat leh RAT hmanga hmuh 25 an ni. District parukah hmuh a ni a, district pangaah hmuh a ni lo thung.

Nimin tlai dar 5 thlenga dinhmun angin, chawlhkar hnih chuang, ni 17 chhung a záwnin Mizoramah Covid-19 vanga thi an awm tawh lo a, thi an awm hnuhnun ber chu May 2, 2022 kha niin, tun May thlaah mi pakhat chiah thi a la awm.

IDSP record angin, Mizoramah Covid-19 vei 2,28,060 hmuh chhuah a ni tawh a, mipa 1,06,188 leh hmeichhia 1,21,872 an ni a, mipa aiin hmeichhia 15,684-in an tam zawk. Nimin tlai dar 5 thleng khan mi 2,27,197 (99.62%) chhuahtir an ni tawh a, mi 697 (0.31%) thi tawhin, enkawl mek mi 166 (0.07%) an awm.

Nimin tlai khan Saitual district-ah hripui vei enkawl lai 64 awmin, Mizorama district 11 zingah active case tamna ber a ni a; district pathum - Siaha, Champhai leh Lawngtlai district-ah hripui vei an awm rih lo.