Thalaite tan theihtawp kan chhuah - Rinmawia NIAS-a zirlai tirhah file kan hmu lo - Sangkunga

Minister of state a nihna aṭanga bânna thehlut ta Lalrinmawia Ralte chuan, Mizo ṭhalaite'n hna an hmuh theihna atan theihtawp an chhuah ṭhin thu a sawi. Mizoram Youth Commission (MYC) chairman a nihna aṭanga bânna thehlut ta T Sangkunga pawhin, NIAS, Kolkata-a zirlai tirh chungchanga file-te chu amah leh LEIT Minister-in an hmu lo niin a sawi.

Lalrinmawia Ralte leh T Sangkunga te hian nimin khan Congress Bhavan-a inkhawmah thu an sawi ve ve a ni. Hetih lai hian, an nihna aṭanga bânna an thehluh chungchangah Chief Minister-in thutlukna a la siam loa thu dawn a ni.

Lalrinmawia Ralte chuan, khawiah pawh an kalin, an theihna hmun apianga Mizo ṭhalaite'n hna an hmuh theih dan tur kawng an zawn ṭhin thu sawiin, "Ṭhalaite duhsakna avangin sorkar laipuiin an pawm, him dam taka hna an thawh theihna turte kan zawng ṭhin. A fee to tak tak lam hi chu tih chi-ah kan ngai lo, zirlaite kan tirh vek theih dawn loh avangin," a ti.

Mizoram páwna ṭhalai tirh chhuah tawh zat, hna hmu tawh zat tam tak sawi tur a awm tih sawiin Lalrinmawia Ralte chuan, "Hlawhtlinna report tur tam tak a awm a ni," a ti a; thil duhawm lo a thlen palha indemna a nasat avangin Mizoram páwna ṭhalaite thawn chhuah chu state sorkar ang pawha ngaihtuahna sên ṭul a tih thu a sawi.

T Sangkunga chuan, NIAS-a zirlai tirh an nih vanga boruak an tawhah inpuh zel a nih dawn chuan ṭhalaite intirh chhuah tawh loh mai tihte a ngaihtuah thu sawiin, "Sorkarin mi 2,000 chuang a tír chhuak tawh a, hlawhtlinna chang pawh tam tak an awm. NIAS-a zirlai tirh chungchangah hian kan minister nen a file pawh kan hmu lo hrim hrim a ni," a ti.

State páwna ṭhalaite training tura tirh chhuah chungchang chu an hotute thu thu a ni tawh tih sawiin Sangkunga chuan, "Tunah hian company ṭha tak tak biak mekte pawh kan nei; mahse, tunah chuan ṭhalaite tír chhuak tura hmalakna a awm rih lo," a ti a; ruahmanna awmsa erawh company-te'n rintlak loa sorkar an ngaih hlauh avangin an la tih hram hram niin a sawi.

T Sangkunga chuan, file pawh an hmuh ve loha zirlai tirh an nih chungchanga an insawifiah thei rih lo tih sawiin, "Boruak a len tawh chuan insawifiah a har tawh a, boruak a tisang hluai thei. Dik lo baksaka min puhnate pawh a awm," a ti.

Lalrinmawia Ralte leh T Sangkunga te hian NIAS, Kolkata-a zirlai tirh an nih chungchang avangin February 15 khan an nihna aṭanga banna Chief Minister hnenah an thehlut a ni.