Mizoram mistirite'n MBOCWWB sum member-te tan chauh hman an phût

Mizoram Mistiri Asso­ciation (MMA) chuan thuchhuah siamin, Mizoram Building & Other Construction Workers Welfare Board (MBOCWWB) hnuaia member registration-ah danin a phût angin, kut hna thawktute chauh ziah luh an duh thu leh sum pawh inziak lutte tan chauh hman an duh thu an tarlang.

MMA chuan, "MBOCWWB-a labour cess leh member registra­tion fee aṭanga sum tlingkhawm hi a nihna tur ang takin member-te leh an fate hamṭhat nan hman ṭhin ni rawh se," an ti a; register member ni lote hnena sum hman tawhte leh Mizoram Youth Commission leh skill development atana member ni lote hnena training nana sum lo hman tawh zawng zawngte chu rûl turin sorkar an phût.

Mistiri pawlte chuan, MBOCWWB-a sum tlingkhawm, dik lo taka hmangtute chu dap chhuak a, dan anga hrem turin sorkar an phut a, "Member fate educational assistance, member death benefit leh medical assistance-te hi MBOCWWB Rules 3rd. Ammendment angin, member-te hnenah kum 2013-2017 inkara pek loh zawng a hlawma pek leh vek ni rawh se," an ti a; member-te tana hamṭhatna hrang hrang - student assistance, death benefit, medical assistance, pension fund, maternity fund, loan, etc. te chu chhenfakawm zâwka pe turin an ngen.

NIAS, Kolkata-a zir­laite senso sorkarin a rûl dawn a nih pawhin MBOCWWB suma rulh an remti lo tih sawiin MMA chuan, "Construction worker member ni lo, MBOCWWB suma training lo nei tawh hlawhtling taka eizawnna ngêlnghet nei tawhte pawhin MBOCWWB sum hmanga an inzir thiamna hi an rulh leh ngei theih nana hma la turin sorkar kan phût a ni," an ti.

MMA chuan, LEIT department enkawltu minister atan labour law lam thiam leh kut hnathawktute hmangaihtu dah ni se an duh thu an tarlang a; February 10, 2017 zana LEIT direc­torate building bula bomb puak chu hriatthiam har an tih thu leh, bomb tipuaktute mana dan anga hrem tura sorkar an phût thu an tarkang bawk.