Champhai dist-a inthiarna neih kim lawm ; Fai hi ringtu nih nen a inhmeh: CM Hawla

Pawn lama inthiar awm lohnaa Champhai district puan tawh chu nimin khan Champhai Keifangtlanga DC Indoor Stadium-ah lawm a ni a, chief minister Lal Than­hawla leh PHE minister Zodintluanga ten an hmanpui. CM Hawla chuan, mipui thlan tlinte chu mipui chhiahhlawh an nih thu leh faina chu Pathian ringtu nih nen a inhmeh thu a sawi.

Chief Minister chuan, tun hma deuh chuan Mizo nunah tuikhur hnár tihbawlhhlawh loh tur, kawng thlanga zuna kawng chhaka inthiar tur tihte a nih ṭhin thu sawiin, "Tunah chuan Champhai district chu páwna inthiar awm tawh lohna a ni a, a lawmawm hle. DC ṭha takin department hrang hrang thawhhona ṭha tak nei turin hma a la a, a lawmawm. A tihlawhtlingtu mipuite thu­awihna a fakawma ni," a ti.

Congress party-in sorkarna an chelh hmasak laiin Clean Aizawl tih te, Clean Mizoram tihte an kalpui thu sawiin, CM Hawla chuan, "Tuna Pu Modi hoa Swatch Bharat-ah group siamin, CM 15 a telh a, hmarchhak aṭangin keimah ka tel a ni," a ti a; UDPA Minister kaihhruaina hnuaiah khawpuite'n hma an sawn thu leh faina lamah Mizoram chu India ram stgat zingah fâl taka a tlân a ngaih thu a sawi.

Lal Thanhawla chuan, faina chungchangah Panchayat inthlan­ah candidate tur chuan an in chhungah inthiarna an nei tur a ni tih a nih thu sawiin, "Mipui aiawha thlan kan nih chuan chhiahhlawh kan ni a, sorkar hnathawkte hi sorkar chhiahhlawh, government servant an ni. Thlan lal hi public servant an ni a, an intihlal emaw, an induh emaw chuan hmuhsit an kai mai," a ti.

Chief Minister chuan, sum­dawnna lamah khawchhak nena inpawhna atan nasa taka hmalak a nih thu sawiin, "Railway pawh Kawrpuichhuaha lûtin Lawngtlaiah kaltir tum a ni. Chhim lam, Latawh-ah airport siam theihna a awm an ti a, DPR siamin kan inpuahchah mek," a ti a; India independent hmain Mizoram chhim lam chu kawtchhuah a ni a, tunah kawtchhuah ni turin an puahchah leh mek tih a sawi.

PHE minister Zodintluanga chuan, Congress party kaihruai sorkarah hmasawnna a zuanin a zuang niin a sawi a, "Champhaia ka kal apiangin hmasawnna rahbi ka hmu ṭhin," a ti.

Zodintluanga chuan, Mizo­rama kawngpui siama hmasawnna lian tham reng reng chu CM Lal Thanhawla hunlaia project siam a ni ṭhin nia sawiin, "CM Hawla sorkar hnu veka kawngpui ṭha leh lian hi piang vek a ni," a ti a; Champhai kawng chu National Highway-a puan a nih tawh thu leh double lane a ken tel thu a sawi.

PHE Minister chuan, Cham­phai district pum chu páwn lama inthiar awm lohna, Open Defecation Free (ODF)-a puan a nih theih chhan chu DC, sorkar department leh khawtlang hruaitute thawhhona ṭhat vang a nih thu a sawi a, "District dang pawhin ODF puang turin nasa takin hma an la a, an ṭan phah hle a ni," a ti.