KHAWTHLIR
Thisen pe
Hrangbana College NSS unit chuan nimin khan an college-ah blood donation camp an huaihawt a, Aizawl Civil Hospital tan mipa 97 leh hmeichhia 50-te'n thisen unit 147 an pe.
Tanpuina hlan
Mizoram Merchant Association (MIMA) chuan an member kângmei tuar chhungkaw paruk hnenah nimin khan ṭanpuina an hlan. MIMA hian ṭanpuina atan hian an member-te zingah vehbûr an khawn a, an sum hmuh hmang chuan kângmei tuarte hnenah Rs. 20,000 ṭheuh an pe a ni.
Mizo thuam Inbel turin ngen
Mizoram sorkar chuan ngenna siamin, March 3, 2017-a Chapchar Kût hman tur pualin, March 1 leh 2-ahte sorkar hnathawk zawng zawngte chu Mizo thuam nena pisa kai turin a ngen. Chapchar Kût hi hnam nunphung leh ziate chawi lârna hun a nih avangin ngenna hi siam a ni.
Kudam hawng
NABARD kaltlanga Rs. 1,05,73,000 sênga sak, Silsury khuaa Supply centre leh quarter pahnih chu Ningani khan Supply minister John Rotluangliana'n a hawng. Kudam hi buhfai quintal 2,500 leng thei tura sak a ni.
Phone line chhia
BSNL chuan thuchhuah siamin, Khatla kâwna PHE department-in pipe phûmna tur lei an laih avangin Khatla, Mission Veng, Sikulpuikawn leh Kulikawna telephone/internet a tichhe nual tih an tarlang a; harsatna neite chu telephone no. 0389-232500 leh 2327000 ah thlen turin an chah.
Ruihhlo man
Lunglei police-a District Special Branch (DSB)-te chuan, nimin khan Lunglei Pukpuiah maxicab MZ-02 A-0251 aṭangin Sipla (spasmo) mûm 2,795 an man a, Rs. 1,39,750-a chhût a ni. Ruihhlo neitua puh maxicab driver Kailash Singh (44) h/o TC Vanlalruati, Haulawng nia insawi an man nghal.
MLA-in tanpui
MLA Vanlalawmpuii Chawngthu chuan, nimin khan Khawbunga Mizo Hlakungpui Mual enkawlna atan Organising Committee hnenah Rs. 10,000 a hlan.