NIAS-ah sorkarin action a la zel ang - R Lalzirliana

Home minister R Lalzirliana chuan, Nalanda Institute of Advance Studies (NIAS), Kolkata-a Mizo zirlai tirh an nih chung-changah a ṭul angin sorkarin action a lak zel tur thu a sawi.

NIAS-a zirlai tirh chu sorkarin a chhui chian zel dawn thu sawiin Home Minister chuan, "Suspend ringawt hi inhremna a tling lo a, chhui a nih dawn avanga inchawlhtir lailâwkna mai a ni. Sorkarin a ṭul angin action a la zel dawn a, a mawhphurhtu chu hrem an ni ang," a ti.

R Lalzirliana chuan, Lalrinmawia Ralte leh T Sangkunga ten bânna an thehluhah party aṭanga innawrna a awm lo tih sawi nawnin, "Bânna an thehlut hi fair takin chhui zui rawh se an tihna a ni," a ti a; an bân loh chuan inhmaizahnate a awm a hlauhthawnawm niin a sawi.

MPCC Vice President chuan, MNF sorkar laia minister-te'n thil an tih dik loh hrang hrang leh thil thleng hrang hrangte sawiin, "Báng tura nawrtute zingah hian an sorkar lai khan an nihna aṭanga báng pakhatmah an awm lo," a ti.

MNF hun laiin Gulshan Sharma kaltlangin Mizo ṭhalai eng emaw zat state páwnah tirh an nih thu sawiin R Lalzirliana chuan, "Ṭhalaite'n hna an hmu leh thei si lo," a ti a; chu thil thleng avang chuan mawhphurhna laa báng an awm loh thu a sawi.