NAAC-in Lunglei College endik

National Assessment and Accreditation Council (NAAC) Peer Team chuan February 15, 2017 aṭang khan Lunglei College an endik a, an thil hmuhte college hotute hnena hlanna hun Nilaini khan buatsaih a ni.

NAAC Peer Team chairman Prof. Okhil Kumar Medhi chuan, Lunglei College-a thawktute an ṭanrual chuan hma an sawn zel theih a rin thu a sawi a, "Kan thiamnate zirlaite hnena zirtir duh tâwk mai loin, engtin nge vantlang mipuiin an chhawr ṭangkai theih ang tih kan ngaihtuah a ngai," tiin, research hna nasa lehzuala bei turin a chah.

NAAC Peer Team hian Lunglei College-a department 14 leh support service pariat an tlawh a; zirtirtu te, zirlaite leh nu leh pate nen an inkâwm bawk. Lunglei College an endiknaa an dinhmun (grade) chu thla hnih hnu velah tihchhuah beisei a ni.