Lungleiah Road Safety Week khar

Lunglei District Level Road Safety Committee chu nimin khan DC K Lal­rohlua hoin a pisa-ah an ṭhukhawm a, Road Safety Week an khar nghal.

K Lalrohlua chuan week chu khar nimah se, a tawpna a ni lo tih sawiin, “Week hi kumin chhunga lirthei khalh fimkhur tura kan in hrilhhriat thar lehna hun a ni. Mizote hi traffic duty emaw a vengtu an awm loh avangin ngaih kan tiṭha mai ṭhin a, he mi kawngah hian kan inzirtir a ngai a ni. Mithiamten ngun taka an zir hnua sorkarin ṭha a tih a dan a siamte kan zawm tlan hi kan him tlanna a ni,” a ti.

Week chhung hian auto rickshaw, maxi cab leh taxi driver ṭha leh ruihhlo laka fihlimte thlan chhuah an ni a, chungte chu Lamkunga (auto rickshaw), K Lalremliana (maxi cab) leh C Lalhmunsiama (Taxi) te an ni.