Chhung tin hnena tui pek hna ṭha zawka kalpui turin Jal Shakti minister-in CM a hrilh

Union Minister of Jal Shakti, Shri Gajendra Singh Shekhawat chuan chief minister Zoramthanga hnenah lehkha thawnin Mizorama Jal Jeevan Mission (JJM) kalpui dan a muang lutuk chu a ngaimawh thu a hrilh a, 

chak zawka hma la turin a chah.

Press Information Bureau (PIB) tarlan danin, Gajendra Singh Shekhawat chuan Chief Minister hnena lehkha a thawnah hian JJM thil tum tihlawhtling turin ruahmanna fel tak neih a ngaih thu a tarlang a, CM chu piped water supply scheme awmna anga an report tawh khaw 655-ah rang taka hma la turin a hrilh.

Union Minister chuan JJM sum pek chhuah dan tarlangin, "Tui connection pek zat leh fund awmte hman a nih dan (utilization) behchhanin pek a ni," a ti a; Mizoram chuan kum 2019-20 chhunga tui connection pek tura ruahman chhungkua 23,525 aṭangin chhungkua 15,878 hnenah a pek thu a sawi.

Shekhawat tarlan danin, kum 2019-20 chhung atan Mizoram chu JJM hnuaiah cheng vaibelchhe 39.87 ruahman sak a nih bakah performance grant nen cheng vaibelchhe 68.05 pek a ni. Hemi aṭang hian state hian cheng vaibelchhe 37.41 chauh a hmang a, hman lohin cheng vaibelchhe 30.78 a awm. 

Mizoram chan tur chu kum 2020-21 chhung atan cheng vaibelchhe 79.30 a tihsan a ni a, pawisa hman ban (opening balance) cheng vaibelchhe 30.78 nen kum 2020-21 atan Mizoram hian cheng vaibelchhe 110.08 a nei dawn a; state matching share nen chuan Mizoram hian JJM hmalakna atan hian kum 2020-21 chhung atan cheng vaibelchhe 122.30 a nei a ni. 

Sorkar laipuiin thingtlang mite hnena an in chhunga tui pek chu a ngai pawimawh hle tih sawiin Shekhawat chuan, "State sorkar hian hun tiam chhunga tipuitling turin hma a la tur a ni," a ti.

Covid-19 hripui leng avang hian vantlang tuikhurah mi tam tak an awm khawm loh a pawimawh hle tih tarlangin Shekhawat chuan, Mizoram CM chu khaw tinah water supply siam hna thawka in tina tap connection pe turin a ngen a, "Hei hian a takin social distancing kalpui a tiawlsam dawn," a ti.

Jal Shakti Minister chuan December, 2022 ral hmaa Mizoram chu in tina tui connection awm vekna state-a siam tura puih a inhuam thu sawiin, Mizoram CM chu JJM atana ruahmanna leh a kalpui dan tur sawi duna video conferencing hmanga kawm a tum thu a tarlang.