FMGEW-in central DA ang pek an phût ; May thleng sorkar an ngaichâng dawn ; Pension hun kum 62-ah tihsan an duh

Mizoram sorkar hnathawk pawl hrang hrang intêl khawmna, Federation of Mizoram Government Employees & Workers (FMGEW) chuan, sorkar laipui hnathawk dearness allowance (DA) ang pek an phût a, "May 2022 thleng sorkar ngaihchan kan rêl," an ti a, sorkar hnathawk pension hun kum 62-ah tihsan an phût bawk. An thil phûtte hi FMGEW chuan May 19, Ningani khan ziakin chief minister Zoramthanga hnenah an thlen.

FMGEW chuan, Chief Minister hnenah hian Additional Chief Secretary leh Principal Secretary (Finance)-te nen a huhoa an sawihonaah March 1, 2022 aṭangin DA 28%-ah tihpunsak tur thu leh sorkar laipui hnathawkte an phâk lohna pawh financial year thar (April 2022) aṭangin ngaih pawimawh a nih tur thu sawi a ni tih an tarlang a, "DA 28% hi a chunga sawi ang hian kan hmu tawh a, kan lawm hle a ni," an ti.

Financial year thar chuàn kài a nih hnuah thla hnih a liam leh dawn tawh thu tarlangin FMGEW chuan, "Central employee-te DA rate kan phak lohna hi sorkarin min pek hlan kan nghakhlel tawh hle," an ti a; DA chungchang sawipui turin dilna vawi hnih siam tawh mah se, hun remchang a la awm theih loh avanga pawi an tih thu an tarlang.

An member-te aṭanga nawrna a nasat avangin May 18, 2022 khan an pawl Executive Committee-in DA pung chungchang a ngaihtuah tih ziakin FMGEW chuan, "May 2022 thla chhung sorkar hmalakna ngaihchàn leh phawt ni se, hmasawnna a awm loh chuan June 2022-ah General Council Meeting koin, hmalak zel dan tur ngaihtuah ni se tiin kan rêl," an ti.

FMGEW tarlan danin, DA hi July 1, 2021-ah central sorkarah 31% a ni a, Mizoram sorkarah 17% a ni. January 1, 2022-ah central-ah 34% a ni a, Mizoram sorkarah 17% a la nih rualin, March 1, 2022 aṭangin 28% a ni. July 1, 2022-ah central employee-te DA chu 4%-in a pung leh dawn a, 38% a tling tawh dawn a ni.

Central an phâk lohna a tam chuan sorkar tan phur a rit zual zel tih tarlangin FMGEW chuan, "DA-a central kan phâk lohna hi min ngaih pawimawhsak a, min pe thuai turin kan rawn dil nawn leh a ni," an ti.

FMGEW chuan, pension kum tihsan chungchangah, "Recruitment a tih mai theih loh avangin department tinah thawktu indaih lohna a nasa tawh em em a, chutih laiin, thla tinin mi eng emaw zat pension (retirement)-in an chhuak reng thung. Department tam tak chuan kan thawh tur ang pawh kan thawk hlei thei ta lo," an ti a; pension kum chu kum 60 aṭangin kum 62-ah tisang turin Chief Minister an ngen a ni.