Thawktu indaih lohna chingfel turin theihtawp chhuah a ni - Health Minister
Mizoram Government Nursing Service Association (MGNSA) chuan nimin khan Dawrpui Multipurpose Hall-ah Biennial General Conference vawi 21-na an hmang a; khuallian Health minister Dr R Lalthangliana chuan, Health department-ah thawktu indaih lohna chingfel turin theihtawp an chhuah mek thu a sawi.
Health Minister chuan thawktu indaih loh chungchang sawiin, "Theihtawp chhuahin hma kan la mek. Kum 2020 khan Health department hnuaiah hna ruak 734 zet hnawhkhah phalna sorkarin min pek vek tawh hnuah Covid-19-in a nang a, sorkarin inrenchemna a kalpui tâk avangin tihpuitlin theih a ni ta lo," a ti.
Dr R Lalthangliana chuan, hripui léngin ziaawm lam a pan hnuah health sector-a hmachhawp an neih an tihhlawhtlin theih tâk lohte bawhzui leh an tum thu sawiin, "Japan mi thiamte nen ṭangkawpin Cancer Superspeciality Hospital siam tum mek a ni a, World Bank sum hmangin health sector hmasawnna tur thawh tum a ni," a ti a; March 2022 hmain Mizorama health sub-centre zawng zawng health & wellness centre-a hlàn kai hman vek an tum thu a sawi.
Nurse hna chu hna zahawm leh ropui a nih thu sawiin Minister chuan, “Mi dangte tana rawngbawlna, service pawimawh leh danglam a ni. Hripui lên vanglai, boruak hrehawm lai takin rim takin hna an thawk a, an inpekna a ropui. Mizoram mipui damlo mangang taka awmte enkawl hna nasa takin an thawk a, an hnathawh hlutzia leh ṭangkaizia a lang chiang hle,” a ti.
Health Minister chuan, rim leh hah taka thawk Mizorama nurse zingah Covid-19 vanga thi an awm lo chu lawmawm a tih thu sawiin, “Pathian venhimna a ni. India ram hmun dang hospital lian tak taka thawk turin Mizo nurse-te an duh hle. Phaia private hospital lian tak pakhat chuan Mizo nurse-te chu an thiamna piah lamah hmangaihna leh lainatna an ngah avangin an duh hle a ni,” a ti a; Mizoram páwna nurse thawk zingah bànsan ta an tam erawh pawi a tih thu a sawi.
MGNSA inkhawmpui hi kum hnih danah neih ṭhin a ni a, hripui léng avangin kum 2020 khan an nei thei lo. Kumina an conference-ah hian kum 2019 aṭanga 2022 chhunga an member pension mi 39 hnenah thlahna thilpek an hlân a, an member thite sûnna hun an hmang bawk.
Chawhnu lamah hruaitu thar thlanna leh rorel inkhawm an nei a; an rorel zingah - thla 13 hlawh dil chungchang te, tutor/PHNO/ward superintendent-te group B gazetted level-a hlân kai a nih theih nana hmalak te, Mizoram Nursing Service-te tana state award siam rawtna leh nursing directorate neih chungchangte a tel a ni.