Tui anga nghet lo kutah Zoram hruaitu nihna chung lamin a pe ngai lo - Zorama

MNF president Zoram­thanga, chief minister ni bawk chuan party ṭhen­khatin an kalphung an tidanglam ngun lutuk a, mipuiin an zui zo lo nia sawiin, "Tui anga nghet lote kutah Zoram hruaitu nihna chung lamin a pe ngai lo," a ti.

Zoramthanga hian nimin khan Serchhipah MNF pisa, Mizo Hnam Rûn a hawng a; thu sawiin, "Party ṭhenkhat leader-te pawh MP leh ruling party president niin ramhnuaia kan awm laiin bul an ṭan tawh. Tui anga nghet lote kutah Zoram hruaitu nihna chung lamin a pe ngai lo tih kan hmu. An aupui ber kalphung thar an tidanglam ngun lutuk a, mipuiin kan zui zo lo a ni," a ti a; MNF party erawh chu chung lam remruat ang zelin an kal niin a sawi.

Political party ṭhen­khatin Delhi khawnvartui bûr an ring nia sawiin Zoramthanga chuan, "Delhi lamah a búr a tlûk ruah tawh chuan a phitá a râwp ral ve nghal mai ṭhin. Neitu nihna phun tel lo, mahnia din chhuah tumna zung nei lo, Delhi khawnvartui ringa nungte chu an zuih ral mek a, Jehova Pathian tlansan a, Lord Krishna ringtute tlâkchhiat dan hi nasa tak a ni," a ti.

MNF President chuan, Mizo nationalism zung kaihna leh sawina hmun tur Mizo Hnam Run an din zel dawn tih sawiin, "Pathian leh kan ram tan tia chung lama innghat tlat kan nih avangin tlâkhniam chángte nei ṭhin bawk mah ila, tlu chheloin kum 60 kan thleng thei a ni," a ti a; Pathian leh kan ram tia bul ṭan an nih thu a sawi.

Zoramthanga chuan, "Chung lam remruat ang zelin kan kal a, India rama mihring tam tak zinga chanchin ṭha hril turin remna min pe. Pathianin hun a tih lohah chuan sorkarnate hi a lâk ngawt theih loh, hmân aṭanga Pathianin hlawhtlinna hmu tura movement a kalpui leh thil tum tihlawhtling tura hmanruaa min hman a duh a ni," a ti bawk.

Serchhipa Mizo Hnam Rûn hmun hi June 30, 2002, Remna Ni khan mimal hnen aṭangin an lei a, June 19, 2019-ah sak ṭan a ni. Mizo Hnam Rûn hawnna inkhawmah hian MNF zawm thar mi 45-te leh chawhnu lamah MNF Serchhip West Block Conference, Thenzawl Joint YMA Hall-ah mi 208-te MNF President-in a lawm luh thu MNF thuchhuah chuan a tarlang.